De wintjertied begós mèt zomerse temperature. Ich höb kómpassie mèt het klimaat. Sjtraks vèltj Kerstmis nog op de heitste daag van het jaor. Dan is het aafgeloupe mèt het fiëst woeë ein dramaties wintjerverhaol aan vasthingtj woeëvan ich as kindj bekans mós bäöke: Jozef en Maria, sjleipe zich, sjteinkaod, oetgepötj, door biëstewaer, nao Bethlehem, äöver ónbegaonbaar veldjpaedjes, door het halfdónker, op eine aezel. Ze kriege nörges óngerdaak. Maria kan intrintj neet mier, mer dreugtj aeve good ein kiendje in de boek det mich kumtj verlosse van de doeëdzunj. Det is ein saort virus det ich al väör mien gebaorte van Adam en Eva höb mètgekrege. Maria mót door, pien of neet. Het kan nog erger: het wicht, Zoon van God, waertj gebaore in eine aope sjtal, löptj het risico op minstens ein döbbel lóngóntsjtaeking. En det väör mien verlossing!
In miene kinjertied waas het mèt Kerstmis in Haelen dök net zón nöt waer as in het dramaties kerstverhaol. Det mook het gemaekelik väör te geluive in de waorheid van het verhaol. Zoeë get gruweliks kreeg zelfs de duvel neet verzónne. Het klimaat is mèt zien grellige fratse hel bezig van het wintjerfiëst oet mien jeugd ein zomerfiëst te make. Kerstmis haet al väöl aan beteikenis verlaore; zónger sjnië, vorst en hagel blieftj d'r väör mich niks mier van äöver. Dan besjteit ouch de gezellige, werm hoeskamer mèt de versierdje denneboum sjtraks neet mier. Kerstmis vere, boete, in de korte bóks, is det de toekomst?
Höb ich dan eine palmboum in de haof sjtaon, volgehange mèt lempkes en gekläördje böl woeë het krubke ónger sjteit? Het zitj d'r diek in det alle kerstleedjes taege dae tied vanwaege het klimaat ein anger tekst höbbe gekrege. Det de versjrikkelike waeg nao Betlehem ein saort actief vakantiereis is gewaore. Det Sint Jozef blie is mèt eine sjtal zónger rame ómdet d'r zoeë teminste nog get frisse lócht binnekumtj. Ich mót d'r neet aan dinke. Haopelik haet het klimaat net zoeë väöl kómpassie mèt mich as ich mèt het klimaat. Dan liktj d'r mèt Kerstmis vanaaf dit jaor altied weer ein gezellig pak sjnië.
2022, waek 45
