De dinsdig det deze column sjmörges op de site van Halloonline.nl kumtj, gaeve Mark Rutte en Hugo de Jonge saoves ein persconferentie äöver corona. Waat ze gaon zègke, sjteit natuurlik neet in deze column. Dae is ein paar daag ierder gesjreve, väördet het ‘laeke’ van informatie waas begós. Ich mós namelik aan eine houp dinger väöroet wèrke. Dae raeje is sumpel: op dae belangrieke dinsdig krieg ich noew lenze in allebei de ouge. Gelökkig kan ich, väör het sjmiddes zoeë wied is, deze column waal nog op mien facebook pagina zitte. Väör sjrievers göltj: Regere is väöroet kieke! Het is te haope det de premier en ziene minister det as regeerders ouch doon dees reis. Efeng.
Ein poeës lang waas corona niet mier HET óngerwerp van gesjprek. Det is flot verangerdj. Op de televisie drave weer batterieje deskundige op, väör te kalle äöver de ‘herfstpiek’ De gezètte sjtaon d’r vol mèt, de zekehoeze ligke d’r weer te vol door, en väöl miense zeen d’r vol van. De sjrik väör weer opgehoktj te waere, zitj d’r links en rechts good in, väöral bie aojere. Die beseffe det ze de meiste tied höbbe gehadj, det meuktj eine noewe lockdown ekstra sjnue. Welke maotregele mótte Mark en Hugo aankondige? Väöl miense zeen dao hiel rechtoet in: verplichtj vaccinere väör ederein, want doe moogs anger miense neet in gevaor bringe. Det kloptj, al geit die maotregel waal erg wied.
Dao zeen miense die ein persuenlike raeje höbbe väör gein sjpuit te wille. Waem God d’rbie haoltj, haet aevel gein gooj raeje, mer meuktj ein dinkfout. Nemes wètj zeker waat God wiltj, ouch zien zjwaor aanhangers op de Veluwe neet. Want get ‘zeker weite’, is gein geluif mier. Waem volhèltj det hae de wil van God wààl kintj, is hoeëgmoedig. Hoeëgmood is ein houfdzunj. Volges zjwaor geluivige sjtraoftj God de hoeëgmoedige zondaar zjwaor. Dae zondaar mót dus neet gek opkieke as hae corona kriegtj, väör sjtraof. Mer het lètste waat dae zondaar wiltj, is de toorn van God äöver zich aafrope. Dao is dus mer ein oplossing, bemindje zjwaor geluivige. D’rin mèt die sjpuit.
2021, waek 44
