Foetballe is de belangriekste biezaak in het laeve. Daobie is foetbal ouch aorlog, volges Rinus Michels. Ich haop iërlik gezagdj det Rinus det neet letterlik zoeë bedoeldj haet. Foetbal is ein sjport. En sjport verbroedertj. Eder vergelieking mèt aorlog sjteit haoks op verbroedering. Mer ja, Michels haaj ouch eine bienaam: de Generaal. Generaals en aorlog huere bie-ein. Troewes, de taal van het foetballe löptj äöver van terme die aan aorlog doon dinke. Väör te winne zooj aanvalle volges kinners de bèste verdediging zeen. Anger kinners boewe väör häör gool ein sjevige, defensieve linie as häöre keeper door de taegesjtenjer ónger veur waertj genaome. Of as zien gool waertj gebómbardeerdj vanoet de twiëdje linie, mèt sjäöt wie kanónskeugel.
Sommige ploge grave zich in in loupgrave. Aeve good mót häöre keeper oetkieke väör sjluipsjötters die hem inèns mèt eine ónverheudse sjäöt kinne betrèkke. Mer väör zón offensief of defensief gevecht begintj, haet de trainer ein takties plan opgesjtèldj. Zooj foetbal dan toch aorlog zeen? Dao leek het pas geleje in de Johan Cruyff Arena hiel erg op. Ajax - Fijenoord leep oet op eine aorlog tösse ein bende 'supporters' van Ajax en het besjtuur en de organisatie van die club. De ME mós mèt väöl man ingriepe. Pas naodet ze de houfdingank van de Arena en het intereur van de hal haje gesjlooptj, vertrokke de 'supporters'.
In Ingelandj is het probleem van hooligans sjtevig aangepaktj. Pas noe beginne oos besjtuurders en wetgaevers serieus mèt ein proof: herriemaekers mèt ein sjtadion-verbod, mótte zich väör eine wedsjtried digitaal melje bie de politie. Zón maotregel is väöl te leef väör hooligans die mèt opzèt verennewere waat neet van häörzelf is, wie de Russe in Oekraïne. Criminele die oetzeen op relle en rotzooi verzouwe het plezeer van angere, óntregele de samelaeving en bringe de rechtsorde in gevaor. En det gebäörtj al hiel lang, neet allein bie het foetballe. Miense zeen det zat. Hie en dao klinktj al eine roop väör eine noewe Adolf H. Die ‘oplossing’ bringtj ós nog väöl wiejer van hoes. Laot in godsnaam het tuug neet de baas waere. Äöverheid, besjerm ós.
2023, waek 40
