De wolf is heilig verklaordj. Daoväör haet Sjtaotsbosbeheer ein incident mèt eine wolf mét opzét sjtil probere te haoje. Mer det is in deze tied bekans ónmäögelik. Het roufdeer kwoom zoeë dun bie eine jaeger, det dae miens zich bedreigdj veuldje. Hae haet het biëst 'een tik moeten geven met een stok' volges De Limburger van aafgeloupe vriedig. De gezèt gebroektj troewes neet het waord 'jaeger' mer citeert Sjtaotsbos. Die organisatie kaltj äöver eine 'faunabeheerder'. Ouch haet de gezèt het in de wäörd van Sjtaotsbos äöver 'een schermutseling tussen een faunabeheerder en een wolf.' Het is dus ein serieus bedreiging gewaest, dink ich dan.
RTV Nunspeet bevestigtj det: 'Jager slaat wolf van zich af met stok in Zwolse bos bij Heerde.' Tösse 'eine wolf van zich aafhouwe' en 'eine tik gaeve' zitj eine waereldj van versjil. Dae jaeger waas mèt eine gast op jacht väör de natuur te behere. Rieëje aafsjete is werk van faunabeheerders. Sjtaotsbos zaet det lever neet hel-op, want jaegers höbbe bie väöl dereleefhöbbers eine kwaolike naam. Dae jaeger haet daoväör vèt gelök det hae van sjrik neet zien gewaer haet gebroektj. Det waas hem deur kómme te sjtaon. Het is nog mer de vraog of hae wegkumtj mèt dae 'tik' aan de erme wolf. Daoväör dink ich det Sjtaotsbos de faunabeheerder haet wille besjerme door äöver het väörval te zjwiege. Want eigelik mót zón incident väör het publiek bekindj zeen.
Miense mótte weite woeë ze baeter kinne wegblieve. Det vónj Sjtaotsbos noe neet nuedig, citeert RTV Nunspeet 'omdat de ontmoeting tussen jager en wolf plaats vond op een plek waar weinig of geen recreanten komen.' Het taalgebroek zaet al zat. Äöver de Heilige Wolf moog gein kwaod waord waere gezagdj of gesjreve. Eigelik mótte wae geluive det dae faunabeheerder ónnuezel is. Dao waas gaaroets gein bedreigendje situatie. Het waas juust ein ontmoeting. Het sjtaaltj nörges op väör dan mét eine sjtek van dich aaf te houwe. Dae jaeger haaj de wolf ein handj mótte gaeve. Mer ja, fatsoen. Kóm dao allewiel nog mer éns óm. Ich vinj det Sjtaotsbos excuses mót aanbeje. Aan de wolf.
2024, waek 42
