Pas geleje waerdje ich geïnterviewdj door eine reporter van de vastelaovesgezèt. Hae wool van mich weite waat ich van de vastelaovendj vinj, vergeleke mèt wie ich jónk waas. De tied haet neet sjtil gesjtange. Oos maneer van laeve ouch neet, net zoeë min as de vastelaovendj. Logies, wae zeen neet miër hetzelfdje as de miense van sestig jaor geleje. Wie ich mèt vastelaovendj oet begós te gaon, haaj de jeugd gein zin miër in de boerekapelle en accordeonorkeste die in cafés sjpeeldje. Wae amuzeerdje ós bie het jeugddanse op baetmuziek, gesjpeeldj door groepe oet de buurt: Teddy Baers, Roosters, Switching Fighters en nog väöl miër bandjes mèt van die prachtige name. In eder dörp waas get loos väör jónk en aod.
Mer woeë café's, zale en zaelkes verdwiene, kan neet gefiëstj waere. Noe trèkke de sjtaej het jónk volk oet de dörpe weg mèt groeëte fiëste die het karakter van de vastelaovendj totaal höbbe verangerdj. Geholpe door väöral L1, de Limburger en ein paar broewerieje. Zangers en muzikante oet de ganse provincie völle, in de boetelócht, middige en aovendje mèt häör optraejes. Sjtampendje muziek väöral, mèt tekste in het eige dialect. Väör de leefhöbbers van Zoepkoel, Sjtatiefestasie etc. is d'r ein totaal anger maneer van vastelaovendj vere gekómme. Dich amusere door actief bie te drage aan de vastelaovendj in eige dörp, is väör väöl carnavaliste verangerdj in geamuseerdj wille waere tösse doezendje angere. Vastelaovendjvereiniginge höbbe het op de meiste dörpe zjwaor. Net wie bekans alle anger vereiniginge.
Dit is geine klaagzank. Ich sjtèl het vast en aordeil neet. L1 en lokaal tv-zenders doon rechtsjtreeks versjlaag van die mega-fiëste. Zoeë kinne de thoesblievers, vriewillig of door de noeëd gedwónge, d'r ein bietje bie zeen. En genete van de meziek en de bóntje massa jónkvolk det zich in de boetelócht amuzeertj. Waer of gein waer. Ich geneet väöral van de prachtige kesjtuums die väöl carnavaliste op die mega-fiëste drage. Asof ze nao ein gala-bal gaon aan het hof van Sisi. De meiste zeen ouch nog èns fantasties geschminktj. Kunstige meisterwerke zeen d'r bie, woeë ich blie van waer. Efeng.
