Pas geleje mós ich tamelik väöl kóntant geldj van de bank haole. Ich dach det ze mich op het houfdfiliaal in Heitse waal kóste helpe. Fout gedachtj. De mevrouw aan de balie vertèldje vruntjelik det banke gein kóntant geldj mier in hoes höbbe. Det mós ich örges angers gaon pinne, in de bank wore de pinautomate gesjlooptj. De mevrouw verhuegdje het bedraag det ich mèt mien pasje, allein dae daag, kós opneme. Ich reej nao de pinautomaat bie het aod gemaendjehoes in Heitse en toetsdje mien gegaeves in. Het verzeuk waerdje neet geaksepteerdj. Nog èns geprobeerdj, weer aafgeweze. 'Nondedju,' zag ich taege het apparaat. Det lachdje mich oet.
Trök nao de mevrouw van de balie. Ze wis ouch neet woeëväör de automaat zoeë ónbesjoefdj taege mich deej en haaj mèt mich te doon. Gelökkig kós ich drek terecht bie ein anger mevrouw in ein kantoeër. Die begreep waal waat d'r loos waas. Ómdet ich noeët zoeë väöl geldj in eine kier van mien raekening haol, dach de pinautomaat det ich waal eine crimineel mós zeen dae mien raekening wool plundere. Daoväör waas die raekening geblokkeerdj. Gelökkig wis die twiëdje mevrouw waem ze mós belle väör det weer óngedaon te make. Efeng. Ich bèn ram van de kaart mèt mien geldj thoesgekómme.
Ich bekwoom mich get en googeldje woeëväor de Rabobank gein kóntant geldj mier oetgeuftj. Op häör site sjtóng dees kräöpel zin: Voor de veiligheid is contant geld niet meer aanwezig op onze kantoren. Ich waas väör te verrèke. VEILIGHEID! Waem zien veiligheid? Neet die van mich in eder geval. Ich haaj allemaol breefkes van fieftig oet de moer mótte haole, in de aope lócht, zichtbaar väör jan-en-alleman, in drie bäörte. Lekker veilig! Het gedoons väör det geldj, ouch in drie bäörte, in de binnetes van eine dieke wintjerjas te froemele, veuldje óngeluifelik veilig aan. Det ich óngertösse allerlei miense vlak achter miene rögk door huerdje loupe, goof mich eine superveilig geveul. Echt neet dus. Ein sjaemel truest haaj ich: de diekköp van het houfdkantoeër in Utrecht móste häör bonusse ouch boete oet de automate pinne. Echt neet dus.
2022, waek 51
