Det Limburg massaal väör Wilders haet gekaoze, kumtj neet oet de lócht valle. Het zal mèt ermood te make höbbe, voeselbanke. Mèt het geveul neet mèt te tèlle, wueningnoeëd, werkloosheid. Mèt het geveul det de Randsjtad in alles väörgeit, det we väör de Hollandjse media väöral besjtaon väör oetgelache te waere mèt oos zaochte G en oze zangerige oetsjpraok. Det oos provincie half waertj weggegrave väör mergel, kaole, zandj, grindj, turf. En det van de opbringste verdomdj min nao Limburg trökkumtj. Het zal ouch te make höbbe mèt het geveul det oos provincie ein sjtortplaats is väör 'probleme elders'. Wie sjoeën oos Limburg is tèltj neet as Schiphol get trammelant kwiet wiltj. Dan moog Baek de herrie, de sjtank en alle angere äöverlast opsoppe. En as voelverwèrkers te min aafval höbbe, tèltj ouch neet det nemes in Bögkeme zitj te wachte op aafval oet het Ruhrgebiet of Italië.
Ich sjnap det se neet sjtums op partieje die dich en dien probleme neet wille zeen. Mer woeëväör op Wilders sjtumme as se dichzelf door Den Haag boetegesjlaote veuls? Moogs se hulp verwachte van eine politicus dae het boetesjloete al 20 jaor verköptj as evangelie? Besefs se dan waal waat het is as se väör dien veiligheid of laeve mós vluchte? Väör alles achter te mótte laote? Väör van miense die väör häör geveul zelf neet mèttèlle in Nederlandj, te mótte huere des doe neet welkom bés? Al iëwe lang kómme d'r migrante nao Limburg. Vluchtelinge, hanjeliers, ziguiners, arbeiders, gelökzeukers, hoere en huwelikspartners. Weite de sjtummers op Wilders det? Beseffe ze det die Franse, Italiaanse, Poolse, Duitse, Turkse, Baltische, Joedse, Marokkaanse, Hongaare, Russische en al die anger vraemdje name in oze Burgerlike Sjtandj hie haer zeen gebrachtj door boetelandjse miense?
De politieke partieje die zoeë lang de macht haje, moogs se de oetsjlaag kwaolik numme. Die nome burgers en häör terechte zorge neet serieus. Die partieje mótte zich de crisis in oos democratie aanraekene en neet op de tejjer van de kezer ligke. Mèt Kerstmis vere we de gebaorte van de Verlosser. Det is neet Wilders. Det zeen we allemaol same. As we wille.
2023, waek 50
