Nog neet zoeë lang geleje waas d'r dök gesjteggel tösse dörpe die dun bie-ein loge. Op kèrmisse en bie het foetballe waerdje det aaf en toe oetgevochte. Meistal ging het eigelik nörges äöver. Det die van Roggel beväörbeeldj dachte det die van Heitse het hoeëg in de bol höbbe. Want waem neumtj zich noe Klein Paries? En det ze in Heitse op häör bäört maendje det die van Baoksem neet zoeë sjlum wore. Want dao zatte ze de kèrk binne as het raegeldje. Aaf en toe kómme die aoj taegesjtèllinge nog èns trök. Pas geleje beväörbeeldj bie eine talkshow-aovendj in Haelen mèt de perfecte naam 'Vreigele op het kesjtiël'.De organisatie zat eine Nunhemse en eine Haelese jóng taegeäöver-ein väör te kieke of de vreigel van vreuger tösse die twië dörpe nog altied besjteit.
Ich waas benuudj, want Haelen en Nunhem zeen zoeë aan ein gegreudj det se Nunhem bie wieze van sjpraeke Haelen-Noord kins neume. En vooruit dan ... ómgedrejdj kins se van Haelen natuurlik Nunhem -Zuid make. Al is dae naam neet erg logies. De twië gaste krege de vraog väörgelagdj: Huertj de Litsberg bie Nunhem of bie Haelen? 'Bie Nunhem,' zagte ze allebei. Mer toen kwoom dae Haelese mèt ein geweljig verhaol. Lang geleje loge aan de randj van het Haelens Brook allemaol zandjberg. Die zeen deils weggegrave, mer neet allemaol. De ganse zandj van eine van die berg is door de windj weggeblaoze, juust wie det noe mèt Sahara-zandj gebäörtj. Dae Haelese zandj is nao Nunhem gewejdj en dao is de Litsberg oet óntsjtange. Dus de Litsberg ligktj waal in Nunhem, mer is eigelik van Haelen.
De zaal loog krómp van het lache. De Nunhemse waas het mèt die theorie èns. Mer, het verhaol van Haelen waas neet compleet, volges hem. Want dae sjtuufzandj oet het Haelens Brook waas mer sjaemele, losse zandj. In de loup van de tied waas dae zandj door raegel en sjniëwater gans de Luebaek in gesjpeuldj en mèt het water van de baek weggeveurdj nao de Maas in Naer. En dae zandj hètj dao noe de Vèsseberg. Nunhem - Haelen 1-1.
2023, waek 46
