Ellie en ich höbbe min vaste gewuendjes die op oër en tied mötte gebäöre. Mer sjwintjers aete we óm zès oër doorein ein tas soep en kieke in de gang nao het journaal. Det lètste kós ich zónger meute misse, want van het meiste noets waers se neet blie. Die soep zooj ich väör gein goud wille misse, want dao waer ich waal blie van. Ellie meuktj die soep zelf. Eigelik verdeentj het väör soep make ein gouw medalie, dach ich wie we de väörige waek maondjig, mèt ein groeëte tas erwtesoep väör ós, het journaal lete väör waat het waas. We keke nao het sjaatse van de Olympiese Sjpele die we verder amper volge. Mer de 1000 maeter väör dames sjtóng as oetzunjering op oos programma.
Waat ein prestaties waerdje dao neergezatte door de drie oranje dames. Suzanne Schulting sjtóng lang baove-aan, mer zag zelf al det ziene tied neet good genóg waas väör ein medalie. Det haaj het good gezeen, want taege het inj reej Femke Kok in ein prachtige race zoeë hel det ederein d'r raekening mèt heel det het iërste zooj waere. Mer de kook waas nog neet op. In de allerlètste race leet Jutta Leerdam zeen det het nog helder kós. Het mook d'r ein óngeluifelike triomftocht van nao het goud. Het bèste waas bewaardj väör het lètste. Sjpannendjer kós het neet. Ein Jutta, twië Femke, acht Suzanne. Sjoeëner kós het ouch al neet. Zeker neet wie Ellie zag: 'Dao is nog soep, zulle we nog get pakke?'
Die moke we, naogenetendj van het sjaatse, röstig soldaot en óngertösse keke we nao de beeldje die herhaoldj waerdje. En toen wis ich weer waat mich iërder al haaj gesjtuerdj. Natuurlik neet die super sjportvrouwe. Ouch neet het oetgelaote publiek det fiëstelik oranje oetgedostj oos dames väöroet haaj gesjtuwdj. Waat neet pees väör mien geveul waas het blaerendj, opgeblaoze commentaar van eine van de versjlaaggaevers. Zelfs wie Jutta triomfantjelik nao het podium waerdje gerope, haaj hae neet het fatsoen effe te zjwiege. Hae vónj zien eige gekakel belangrieker. Det verdeendje gein medalie, ouch gein van vètlaer.
2026, waek 8
