Dae laege kaltj allein mer äöver de vot. Det is gein compliment. Eine laege is in dees zin eine man dae graof äöver seks kaltj. En vot is ein aod dialectwaord väör 'vagina'. Ein lank vötje is hetzelfdje aod waord väör 'penis'. Het waord 'vot' in die beteikenisse is bekans gans oet oos taal eweg. Het haet zich waal in ein anger beteikenis versjaove van de väörkantj van het óngerlief nao de achterkantj. Dao is het ein synoniem väör 'kóntj'. Dus jäök aan de vot waas väör oos groeëtaojers ein gans anger probleem as noe. Dao is nog ein taemelike graof oetdrökking woeë het waord 'vot' in allebei de beteikenisse is blieve besjtaon. As aan eine persoeën of ein dink get mankeertj mer ze toch aeve good nog mètkinne, waertj gezagdj: Sjeif votte zeike ouch, of sjiete ouch.
In zien noew beteikenis haet het waord 'vot' ein rits aan oetdrökkinge aan oos dialect gesjónke. Ouch neet allemaol aeve fiën, mer det is eige aan taal. Ich dink det ich ze in dit sjtök neet allemaol bie-ein gezäömerdj krieg. Det zooj ouch väör de vot gesjörgdj zeen, ónbegónne werk dus. As ich det mèt taegezin zooj mótte doon haaj ich de vot in. Det höb ich neet, want waat ich wil, doon ich, ofwaal waat ich in de kop höb, höb ich neet in de vot. Ich gaon d'rväör, al mót ich mich de bein ónger de vot oetrenne, erg väöl meute väör doon dus. Det mót ich allein doon, want nemes zal mich de vot naodrage, ofwaal het werk väör mich opknappe. Gelökkig höb ich ein echte zitvot, want sjrieve is zittendj werk.
De verkezinge zeen net väörbie en versjillendje partieje krege ze flink väör de vot, want ze verlaore zetels. Det kwoom ómdet te väöl kezers häör de vot drejdje, zich van häör tröktrokke. Geine eine liësttrèkker deej asof hae zich dao de vot aan aafvaegdje, asof het hem niks kós sjille dus. Zelfs ein partie die bekans op de vot ligktj, bienao kepot is, heel de mood d'rin. Mesjien dinke ze dao waal: Lek mich de vot.
2025, waek 45
