Wie de sjuufdäör aop ging leep eine forse man de bekkerswinkel in. Hae sjödje zich wie eine hóndj de raegel oet zien haor. Baove het dörp waas ein flinke bies los gebarste. Ein vrouw bekeek de man en vroog: 'Enne, Wiel, raegeltj het?' Ein paar klantje die gratis mètloesterdje begóste te grinnike. 'Bès doe döks sjael, Margreet?' reageerdje Wiel nuetelik. Margreet waas d'r neet van ónger de indrök. 'Ich bèn net binne en toen waas het boete nog drueg,' antjwaordje ze röstig. Wiel wreef zich het gezicht drueg mèt eine zakdook en zag: 'Vroumes, as ich det geweite haaj, waas ich thoesgebleve. Mer dees bies waas neet väörsjpeldj.' Hae haoldje ziene smartphone oet de tes en sjpoesdje. 'Hie, kiek mer. Het zeiktj boete of het noeët mier ophèltj, mer det sjteit d'r neet èns op. Waat höb ich aan waersväöroetzichte as ze het waer woeë ich midde-in zit, neet èns kinne väörsjpelle?'
Det wis Margreet ouch neet. Ze wis waal det häör vader zaliger vreuger geine radio nuedig haaj väör te weite of het drueg bleef of neet. Ze zag mèt gruetse sjtum: 'As de boere vreuger in de ougst wole weite of het drueg bleef, kwome ze nao pap. Ich huer het häör nog vraoge: "Waat tuntj dich, Giel, waat zaet het waer vandaag?" Pap wis het antjwaord natuurlik allang, mer väör de boere ein plezeer te doon, leep hae nao boete, keek nao de lócht, sjtreek äöver zien aegerste-uig en zag dan: "Kins geröstj mejje vandaag, Corneel." Of: "Maak mer det se väör de naomiddig het huij binne höbs, Driek." En het klopdje altied.'
'Mèt die verhäölkes sjeet ich niks op,' knaoterdje de man. 'En mèt deze telefoon al gaaroets niks. Dae póngel haet net zoeë väöl waeze van het waer as mien vot.' 'Woeëväör kieks se d'r dan op?' vroog de vrouw fien. 'Ich höb zón apparaat det läöges äöver het waer verköptj neet nuedig. Ich weit zelf waal det het noe weer drueg is.' 'Aoh jao,' hapdje Wiel. 'Sjtaals doe döks op dien vader?' 'Nae,' zag Margreet naeve häör naas eweg, 'ich kiek nao boete.'
2022, waek 44
