Doe geis het pas zeen as se het doorhöbs. Det is natuurlik ein oetsjpraok van Johan Cruyff. De lètste waeke mós ich dao dökker aan dinke. Ich wil neet weer äöver miene wiesvinger beginne dae twië kiër is geopereerdj. Dae waas aevel waal de aanleiding det Cruyff zoeë dök in miene kop op bezeuk kwoom. De oorzaak waas dan de reactie van sommige miense as ze nao dae vinger keke. Ich haoj hem zoeëväöl mäögelik in de tes. Of duuj hem tösse twië knuip door ónger miene bloes taege mien borst aan. Noe geit het weer ein bietje, mer hae verdeendje geine sjoeënheidspries. Ich wool miense dae sjaemele aanblik neet aandoon. As ze d'r zelf nao vroge, waas det get angers.
Dök drejdje de vraoger zich dan drek van mich aaf: 'Och god, dao kan ich neet nao kieke.' Of: 'Dao waer ich neet tegooj van, ich veul het tot in mien batse.' Zón iërlike reacties kins se nemes kwaolik neme. Ich kan mich hiel good indinke det miense zoeë reagere. En toch kwome zón wäörd aeve good óngemaekelik aan. Dan mós ich dinke aan döbbel gehandicapte in eine rolsjtool. Aan sjlachtoffers die d'r nao ein zjwaor óngelök gans angers oetzeen. Aan miense mèt akelige litteikes van derdjegraods brandjwónje. Die kinne häör uterlik neet in de tes van de bóks of ónger de bloes verberge, as ze det al zoje wille.
Ze zeen en veule de reacties van väörbiegengers die gesjrókke wegkieke. Of eigelik neet wille kieke en dan sjtiekem, oet noesjierigheid, zónger op te valle toch kieke. Waat daodoor juust ekstra opvèltj. De sjpontaan reacties van kinjer die dich in häör ónwetendjheid óngezjeneerdj aangape. Of get nao häör aojers rope, äöver dich. Nae, ich höb det allemaol gelökkig neet persuenlik mètgemaaktj. Waal gezeen bie angere, van aafsjtandj. Ich dink det ich mich noe ein bietje väör kan sjtèlle wie ellenjig emes zich veultj dae det waal regelmaotig äöverkumtj. Boetegesjlaote. Inclusiviteit is bedoeldj as werkwaord. Door miene vinger kreeg ich det door en bèn ich het pas echt gaon zeen. Haopelik meuktj det van miene wiesvinger eine wieze vinger.
2023, waek 27
