Op de binnekantj van miene linkerbein begós maondje geleje ein wrat te gruje. Mèt zoeëget kins se neet precies zègke wanniër het begintj. Mien wrat kós net zoeë good in 2024 begós zeen as in 2025. Det duit d'r eigelik neet toe, mer dao is altied waal emes dae vreugtj: 'Wie lang höbs se det dink al?' En dan wil ich het leefst ein sekuur antjwaord gaeve. Wratte zeen d'r neet echt apetitelik oet. As se op ein zichtbaar plaats zitte óntsiere ze de hoed. Hekse op teikeninge in kinjerbeuk höbbe altied nötte wratte in het gezicht, het leefst op de kin. Ouch nog mèt vies häörkes d'rop, wie sommige aoj oma's oet mien jeugd det haje. Wratte zeen troewes get angers as moezekóntje die in miene kinjertied het gezicht van väöl aoj miense ein griezelig aanzeen gove. Met det is weer get angers.
Ein gelök bie ein óngelök is det wratte gein pien doon. Die van mich zoot troewes neet op ein geviërlike plaats woeë se d'r dich aan kins sjtoeëte. Ze jäökdje ouch neet, ich hoofdje d'r neet aan te kratse, waat ich mèt mögkeböltje waal höb. Last haaj ich der neet van. As het ein biëst waas gewaest, haaj ich ein taam wrat gehadj, väör het zoeë mer èns te zègke. Het nöt dink waas d'r, mer ich hoofdje d'r gein raekening mèt te haoje. Allein mèt douche kwoom ich häör taege. Mèt aafdruege mós ich aeve väörzichtig zeen.
Wie de korte-bókse-tied kwoom, zoog Ellie de wrat zitte die flink waas gegruudj. Het sjtóng op en kwoom trök mèt ein half plantj. Oet de gebraoke sjtengel kwoom oranje-gaelig saap det Ellie äöver de wrat wreef. 'Neet aankómme,' zag het, 'We doon dit voorts aldaag, tot het nöt dink weg is. Hie taegeäover sjteit wrattekroed zat.' De wrat haaj häöre meister gevónje. Ze sjrómpeldje inein en ein waek of drie later, veel ze aaf. 'Det wrattekroed is mesjien ouch good as ekstra greuntje ónger de sjlaaj,' sjtèldje ich väör. 'Zooj ich neet probere,' zag Ellie. 'De plantj hètj neet väör niks Sjtinkendje Gouwe. Ze is hersjtikke giftig.'
2025, waek 33
