19 mei 2020ColumnsFrits Criens

Column Modertaal, ZJWANGER door Frits Criens

Leudal

Het is begós wie Ellie de ierste kier in verwachting waas. Vanaaf dae tied vraog ich mich al mier as viërtig jaor aaf wie het is väör zjwanger te zeen. Dao höbs se as man gein benul van. En toch zooj ich det gaer wille weite. Wille veule. Zelf zjwanger zeen: ich höb hiel lang sjtiekem gehaoptj det mich det nog éns zooj lökke. Det is toch gein raar verlange? Alles mót eine kier väör het ierst gebäöre. Jaomer genóg waas mich het gelök van dae primeur neet gegundj.

Allein Ellie wis van miene geheime druim.

As ich d'r weer èns op eine romantiese aovendj äöver begós, keek het mich op ein apaarte maneer aan. Ich wis dan waat het dach: Dae tiktj echt neet richtig.

 

Natuurlik höb ich hóngerdje verhaole gehuerdj van vrouwe äöver häör zjwangersjap. Waat d'r allemaol in häör ómging. Sjpanning, sjtress, bliesjap, ónzekerheid, twiefel, angst en haop, väör mer èns ein paar dinger te neume. Ouch de verhaole van vrouwe woeë ze achteraaf zelf mèt kinne lache, kin ich oet de iërste handj. Edere daag ein paar pöt augurke laege aete. Midde in de nacht zin kriege in pizza. Neet kinne oetsjeije mèt poetse, of eder oer nao de miens op het werk belle. Ich weit het asof ich het zelf höb mètgemaaktj. Allein, ich höb het neet mètgemaaktj, aan mien eige lief geveuldj. Det waas het probleem. Waas, want noe ich óngertösse de laeftied gepasseerdj bèn det ouch vrouwe neet mier zjwanger kinne waere, höb ich miene  wins laote vare.

 

Mer gister flakerdje de haop op zjwangersjap toch weer op. In de brevebös loog eine folder van ein dame die gesjpecialisserdj is in pienklachte, kanker, äöververmeudjheid, sjtress, burn-out, hormoonsjpegel, bloodsómloup, sjpiersjpanning, lymfecirculatie, aafvalle, vitaliteit, zenuwpien, emoties, zjwangersjapsklachte en algemein gezóndjheid. Ouch preventief. Väör bekans alle probleme mèt lief en geist kins se bie häör terecht. En ouch väör zjwangersjapswinse!

Zooj miene zjwangersjapswins dan toch nog oet kinne kómme?

'Zal ich èns belle?' vroog ich väörzichtig aan Ellie. 'Det mós se zeker doon,' zag het. 'Teminste, as se dich nao de kop wils laote kieke.'

 

 

2020, waek 21

 

 

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.