Erik Scherder is óngerhandj de bekindjste BN'er van alle BN'ers. Zoeë dök is deze Professor in Gezóndj Laeve in de media te zeen of te huere. Op 1 december waertj hae 74, mer hae zuut d'r jónger oet. Jaomer allein van dae baard dae hem weer aojer meuktj. Vol veur vertèltj Scherder wie se vitaal en fit mós blieve. Asof hae ós het iëwig laeve wiltj verkoupe. Hae wètj precies waat rouke, drinke, väör de tv hange, zitte, verkiërd aete, te laat nao bèd gaon en sjlókke doon mèt dien lief en herses. Neet väöl goods. Hae wètj ouch waat waal gezóndj väör dich is: väöl bewaege. Dao geuftj haezelf ein good väörbeeldj mèt. Soms höb ich het idee det hae de ganse daag niks angers duit as fietse, renne, gymnastiek, sjporte, zjwumme en zich inhaoje mèt aete en drinke.
Ich sjnap al die gooj advieze en die optimistiese verhaole, mer doe kins ouch äöverdrieve. Wie dökker emes mich zaet waat ich mót doon of laote, wie minder zin ich höb väör te loestere. Mesjien is det aangebaore waersigheid, mer van te väöl en te dök goje raod waers se meug en dan loesters se niet miër. En zeker neet as dich mèt groeëte naodrök aangeraoje waertj väör get ónplezerigs te doon. Zjwumme beväörbeeldj. Ich höb het geliërdj wie ich óngerwiezer waerdje. Dan mós se mèt dien klas mèt kinne doon, vinj ich. Badmeister Harrie en Jan wore geweljige liërare en we höbbe väöl gelache. Mer ich vónj het zjwumme niks, ouch neet wie het kós.
Mèt mien eige kinjer höb ich ouch gezwómme, väöral op vakanties. Zelfs in de Middelandjse Zië bie hoeëg golve. Mer daonao waas het aafgeloupe. Mèt de kleinkinjer bèn ich dökker nao de zjwumles gegange en eders kiër wis ich waat mich aan zjwumme taegesjteit: binnekómme in ein klam zjwumbad, het gedoons mèt ómkleie, het bad in, naat waere, d'roet gaon, het gedoons mèt aafdruege, mèt ein vóchtige hoed de kleier aantrèkke. Ich vinj het ein sjtraof. Dao kinne al die zaegelinge van het zjwumme väör mich neet taege-op. Dan mer gein iëwig laeve.
2025, waek 42
