De waereldj drejtj gewuen door. Of Matthijs van Nieuwkerk oeët nog op de tv kumtj of neet. Of hae te hel is aangepaktj of neet. Of het hem allein mer óm macht, geldj en roem geit of neet. Of se waal of neet fan van hem wils blieve. Het meukt gein dju oet, de waereldj drejt gewuen door. Want de waereldj haet Matthijs van Nieuwkerk neet nuedig väör door te drejje. Ouch Poetin zal het neet sjpits kriege väör het drejje van de waereldj te sjtoppe. Wieväöl Russiese soldaote hae ouch de doeëd in sjtuurtj, de waereldj drejt door. Of hae doezendj, tiëndoezendj of hóngerddoezendj rakette op Oekraïne liëtj valle. Of hae de miense in det landj eine wintjer lang in dónker en kaoj liëtj zitte. Of hae net zoeë lang blieftj doorgaon tot d'r in gans Oekraïne gein twië sjtein mier op ein ligke. Het zal de waereldj neet taegehaoje väör door te blieve drejje, want dao haet Poetin gaaroets niks äöver te besjtèlle.
In de Biebel sjtaon aafsjuwelike verhaole. De ingele die in opsjtandj kwome taege God woeëdoor d'r eine óngekindje aorlog in de hemel oetbrook, mèt de hèl tot gevolg. Adam en Eva die sjtiekem van eine verbaoje appel ote woeëdoor d'r ein biêstechtig ónwaer van bliksem en dónder baove de waereldj losbrook. De waereldj versjödje d'r gein oer van en drejdje gewuen door. Ouch wie de waereldj te make kreeg mèt eine óngehuerdje zondvloed dae allein waerdje äöverlaefdj door Noach, zien familie, get wèrkvolk en van alle biëste ein vruike en ein menke, sjtóng de waereldj neet sjtil. Zelfs wie de Amerikane atoombómme goeëdje op Hiroshima en Nagasaki deej de waereldj waat hae altied duit: doordrejje.
De Wereld Draait Door heet de talkshow van Matthijs van Nieuwkerk. Ich höb d'r amper nao gekeke. Alles mós sjnel, sjnel, sjnel, ouch zien sjpraektempo. Ich kós hem mer half versjtaon. Väör mich waas het miër: Matthijs draait door. Ouch taegenäöver zien personiël, bleek pas väöl later. Zien óntmaskering mót väör hem veule asof de waereldj sjtil sjteit. Gelökkig haet hae dees zekerheid as truest: De waereldj drejtj door.
2022, waek 46
