’t Is vaerdig
’t is Vaerdig. Hoondervel, de legendarische vastelaovesboyband, numt dees maondj aafsjied nao ’n glansrieke carrière in de vastelaovesmeziek. Neet omdet d’r gein inspiratie meer is, neet omdet ’t publiek häör muug is, mer ómdet ze alles bereikt höbbe wo ze van druimdje! Veur mich is Hoondervel de direkte raeje wórom ich ooit plat bön gaon sjrieve en deze column wil ich dan ouch gaer aan Hoondervel opdrage. Ich höb ouch al ’n bieetje gedach euver de toekomst van de here, want waat motte ze in godsnaam doon mit häör artiestebös es ze neet meer door ós proostende provincie toere?
Ich naem uch aeve mit nao 2010, nao ’n boerderie in Serum. Jack Poels haaj veur ’t eerst ’n serie Nederlandstalige tekste gesjreve en mit ’n aantal muzikante haaj d’r ‘n gelegenheidsgezelsjap ónger de naam Herberg de Troost. D’r waas ’n intiem concertereeks mit aete, drinke en ‘ne herbergsfeer. Jack Poels en ziene groep speeldje leedjes en d’r ware ouch nog get anger artieste. Emil Starkovitz en Bart Storcken en Marco Roelofs ware d’r en ich waas same mit miene pap ‘t Nederlandstalige hoesdichtersduo.
Op de aovendj van de lètste show kwoom d’r emes mit ‘n enorm massief brilmontuur nao mich haer: Ralph Bongaerts van Hoondervel. In 2005 haje ze ‘ne keer de halve finale van ’t LVK bereikt en natuurlik haaj ich dao es Haelese jóng mit vaol bewónjering nao geloesterd. Haele in de halve finale, waem haaj det ooit gedach. Ralf complimenteerde mich met ein van mien gedichte. Hae vonj det ich net wie Jack Poels ouch ens get in ’n anger taal mós doon, mer dan neet in ‘t Nederlands, mer juus in ’t Limburgs, want det haaj ich nog nooit gedaon. Wils se neet ‘ns ein leedje veur ós sjrieve?
Det jaor sjreef ich veur ’t eerst plat, ’t leedje Idder naodeil haet zien veurdeil. Miene vrundj Bart Strocken dae ich good kós sinds Herberg de troost, maakdje de melodie. ‘t Nummer deej gaar niks, mer veur mich blief ‘t bezunjer, want ’t waas mien ierste stök in ‘t Limurgs.
Toch bleef Ralph Bongaerts ’t jaor d’rnao mer belle, ze wore d’r nog neet vaerdig mit en wólle ’t nog eine keer probere. Ich zei sjteeds det ich ech geine tied haaj en dae haaj ich ouch neet, want ich haaj net ein nuuj hoes gekoch en zoot midde in ’n verboewing.
Ich zei det ich waal get wou sjrieve, es zie de verhoezing veur häör raekening zouwe numme.
’n Maondj later sjtinge ze veur de deur. In eine daag höbbe ze mich mit ‘ne zelf geregeldje verhoeswage van Haelen nao Remunj verhoesd. Alle doze móste ouch nog nao de zolder op de derde verdeping. Toen ze ram vaerdig wore, goof ich de tekst van Dao bön ich mit gebaore en det waerde ’n paar maondj later ‘n LVK-finaleplaats. 16 regelkes in ruul veur ’n verhoezing, miene bèste deal ooit. Ich weit zeker det ze det jaor éch alles op alles höbbe gezatte om die finaleplaats te haole. Want sjtel dich veur desse dich ‘ne daag mit de ganse ploog in ’t zjweit wirks en ‘ne hernia hufs en dan neet door kums.
Nao nog ’n finale mit de Alleraafste waas mien inspiratie op, ich waas d’r vaerdig mit. Ich probeerdje ze nog om te kalle. Koup uch toch ’n bös en gank get mit det verhoeze doon, det is kansrieker es ’t LVK winne. Mer zie haje zich get veurgenaome, ’t LVK winne. Ze ginge wiejer mit Bas Keltjens de Naerse tekstsjriever dae neet allein finales haolt, mer ze ouch wint. En jao heur, mit Bas kwome de hits die we noe nog allemaol mitzinge en in 2019 waas ’t pries! Bas Keltjens sjeef same mit Bart Storcken de grote klapper, Groete Oet De Fieësttent. Ich haaj zelf éch neet gedach det ’t haor ooit zou lökke, mer acheraaf haaj ich ’t motte weite. Es ich dink aan mit wievoal passie en doorzittingvermoge Roel en Edgar ooit miene sjpegelkast ómhoog höfde en mit wievaol geluif in de zaak Bert en Harry 60 doze mit beuk nao de derde verdeeping sleipte haaj ich ’t kinne weite: dees manne sjtóppe pas es ze alles bereikt höbbe waat ze wille.
Hoondervel, bedanktj väör alle geweldige leedjes en sjieke optraejes! Ralph, bedankt des se mich ooit oetgedaagd höbs om plat te sjieve. En die artiestebös, gae zeet nooit te aod om ’t sjiekste verhoesbedrief van Limburg te waere. Gae zeet vaerdig mit zinge, missjien is ’t tied veur Vaerdig verhoezinge.
