Ellie en ich zote in de aankomsthal van het vleegveldj te wachte. Väör ós sjtóng ein glaas thië te dampe. Ein sjtum oet de luidsjpraekers reep get óm. Nemes loesterdje. Óm ós haer klónke flarde van allerlei tale. Miense raokeldje mèt koffers op raedjes naeve ós door. Links van ós sjtóng ein vrouw te wachte. Ze haaj ein bördje bie zich. 'Schütze Falderheim', sjtóng d'rop. Baove aan het bördje waas ein papere vlegske vastgebónje. De Duitse driekläör, mèt in het midde ein aafbeeldjing. Het vlegske hing sjlap. Ich kós neet zeen waat die aafbeeldjing väörsjtèldje, mer dörfdje neet te gaon kieke. Ellie haaj zeker gezagdj: 'Doe kums echt van ein dörp.'
Ein sjtök wiejer sjtónge drie mansluuj. Arabiere aan häör kleier te zeen. Ich haaj al mier manne gezeen die zoeë geklèdj ginge. Het sjleit nörges op, mer door alle gedoons mèt terroriste goof det gein plezerig geveul. Dökker as nuedig waas, keek ich häöre kantj oet. Gelökkig waas de oetgangk dun bie. 'Op waem zoje ze wachte?' vroog ich mich aaf. Het antjwaord deendje zich effe later al aan. Ein sjtök of tiën gesjtaltes in boerka's kwome vanoet eine ziegank aangeloupe. Ze wore zoeëget aeve groeët. Het wore sjtevige figure, de boerka's hinge royaal wied óm häör haer. Of haje ze mesjien ... ónger häör kleier ...
Bómgordel! Het waord veel mich zoeë in en sjloog in wie ein bóm. Hie ginge Ellie en ich dalik de lócht in. Mer neet mèt eine vleger. As eine sjuttelsplak hing ich in miene sjtool. De gesjtaltes lepe op de drie mansluuj aaf. Ich kreeg weer haop. Mesjien sjtónge die gewuen op häöre harem te wachte. Mer as het echt echtgenotes wore, wie kóste die mansluuj häör dan ónger die wiej boerka's herkinne? Väör mich wore ze allemaol hetzelfdje. Het probleem losdje zich vanzelf op. De dames lepe nao ein van die men haer en het gezelsjap ging röstig nao de oetgank. Pas toen zoog ich eine groep sjötters in militair uniform achter het bördje 'Schütze Falderheim' nao boete marchere. Det goof ein opgelóchtj geveul. Ich kóm echt van ein dörp.
