'Doe mós d'r èns oet,' zag Ellie van de wintjer. 'Ein paar daag effe weg. Aeve op eine angere, det zooj dich good doon. Waat tuntj dich van de Elzas?' Mich tundje van alles, dus ich vroog: 'Höbs se al get gevónje?' Ellie leet mich op ziene iPad prachtige beeldje zeen van ein gezellig terras mèt volop zón. Ich kreeg vanzelf zin. Lekker werm waer. Ich waas oze zoeëre wintjer käöke-meug. Dus ich vroog: 'Wiene wils se gaon? In de Elzas is het nog wintjer.' Det wis Ellie ouch. Het zag: 'Ich haaj gedachtj aan lètst juni.' Det antjwaord sjtóng mich waal aan. Zoeë waerdje ein paar daag 'effe weg' veer äövernachtinge in het hotel mèt het zónneterras in Rouffan.
Zelf wool ich dao op de trökwaeg nog ein paar daag aan vastplekke in Nancy en Metz. Die sjtónge ouch op oze liest van plaatse woeë we oeët haer wole. Det zooj van ein paar daag 'effe weg' ein sjoeën, 'klein waek' make. De miens wikjt, God besjiktj. Dae haaj het neet good mèt ós väor. Wie we lètst juni vertrokke, wees Tomtom ós de waeg door Pruses. Dan zoje we ein gooj vief oer óngerwaeges zeen. Det waerdje d'r intrintj acht, ómdet Tomtom ós hotel neet kós vinje en ómdet oos route door Pruses ein groeëte file leek. We haje dae zunjig gezelsjap van ein zón die ós mèt 32-33 grade wool oetprobere.
Sjmaondjes begós ze te äöverdrieve: 35-36 grade. We bezóchte prachtige plaetskes. Det waas mèt väöl terasse en liters water nog net te doon. Dinsdes waas het nog ein graad wermer. We kwome waal in sjoeën plaatse, mer het waas ónbegónne werk väör zoeë ein paar daag 'effe weg' te zeen. Op woonsdig zooj het 38 grade waere. Det höbbe we neet mier aafgewachtj. Sjmörges reje we äöver Belsj heivers. Die route waas iets langer volges Tomtom, mer zónger die Duitse files väöl korter in tied. We haje trök inderdaad ein oer minder files as haer, mer waal väöl mier zón. De rest van de waek höb ich mich thoes mótte bekómme van 'effe weg'.
2019, waek 28
