Het jungske aan de kassa waas noew. Hae sloog eine troes tomate aan. Het sjermpke goof € 2,29 aan. De klantj, ein aojer vrouw, zag netjes: 'Die zeen in de aanbejing väör € 0.99.' De jóng kreeg eine kop wie veur en keek häör hulpeloos aan. `Vraog mer nao,' zag ze. Gelökkig wis de jóng wie de microfoon wèrkdje. Binne tiën seconde kwoom de chef aansjtiefele. Hae leep door het klapdäörke van het kassahok en zag taege de jóng: 'Waat is?'
De jóng kreeg eine kop wie veur en keek häör hulpeloos aan.
Het klónk neet vruntjelik. De jóng lag het probleem hakkelendj oet. 'Det höb ich dich toch vertèldj,' zag de chef, 'waat se in zón geval mós doon.' Hae duudje op ein paar knuupkes, pakdje de tomate en sjloog ze aan. Weer goof het sjermpke € 2,29 aan. 'Woeë höbtj gae dees tomate gepaktj?' vroog de chef. 'Bie de greuntje,' waas het antjwaord. 'Örges in het midde.'
'Gank doe èns kieke,' commandeerdje de chef. Sjpood dich.' Het jungske sjpoodje zich zoeë hel det ich neet in de gate haaj det hae al weg waas gewaest. '99 cent,' zag hae. 'Ekstra aanbejing.' De chef sjtook de erm geërgerdj van ich aaf. 'Woeëväör höbs se dae actiepries neet ingeveurdj in de kassa? Det höb ich dich zeker gezagdj.'
De vrouw van de tomate begós zich te ergere. 'Dan ligk het dae jóng nog mer èns oet. Tegooj.
Det ging de jóng te wied. 'Gae höbtj niks gezagdj. En mich ouch neet oetgelagdj wie det inveure geit?' De vrouw van de tomate begós zich te ergere. 'Dan ligk het dae jóng nog mer èns oet. Tegooj. Wae wachte waal ein paar minute.' De klantje achter häör reageerdje mèt insjtumming.
De chef haoldje eine boes sjläötels oet de tes, mook de kassa hiel gewichtig aop en foeterdje taege het jungske: 'Mèt dich höb ich mier gedoons as get angers.' Hae klómmeldje get aan het apparaat en zag inèns taege de miense in de rie: 'Deze kassa waertj gesjlaote. Dao mót eine mónteur bie kómme. Dae klómmel is van sjlaag.' Hae keek het jungske verwietendj aan.' De vrouw van de tomate trok ein knipuigske nao de jóng en zag fien vals taege de chef: 'Mèt dich höbbe we mier gedoons as get angers!
