Ellie waas boete aan het sjildere, ich waas bezig mèt sjrieve aan eine roman. Mer de vèrf waas op en dao móste greuntje kómme. Ich mót aaf en toe weg van de computer väör te óntsjpanne. Same op de fiets, effe op eine angere dus. In de vèrfzaak vroog de man mich: 'Hobbydaag vandaag?' Ich keek nao Ellie en zag: 'Mien vrouw is de klusser bie ós. Ich höb twië linkerhenj.' Dao is niks aan gelaoge. In de haof wèrke geit mich good aaf. Alles woeë ein bietje techniek bie kumtj kieke, duit Ellie. Sjroeve aandrejje, gate baore, bandj van de fiets plekke, neum mer op. Ouch de gäöte vaege, want ich dörf neet op ein leier.
Det zag ich ouch taege de man van de vèrfwinkel. 'Och ja,' zag dae. 'Eder haet zien talente. Doe kins verhaole sjrieve. En dien vrouw is henjig mèt klusse. Dan is het toch good verdeild bie uch.' Dao waas ich het mèt èns. Bie de greuntjeboer troffe we ein vrouw. We kóste häör van ein gezamelike vriendin. Ze waas mèt eine sjportfiets, sjoeëns ze van oze laeftied is. Dan kumtj de kal al gauw op gezóndj laeve. Bewaege, sjporte, gein vèt, min zaot en weinig sókker. Ich deej óngertösse ein zekske aerpele in de fietstas en ein groeët sjpeer paor. Det sjtook ónger de klep oet nao boete.
De vrouw keek d'r vol belangsjtèlling haer en vroog: 'Geis se vanaovendj lekker kaoke?' Kaoke: as ich het väör michzelf mós doon, kreeg ich aldaag bótterhamme. Ich zag dus hetzelfdje as taege de man in de vèrfwinkel. 'Ich höb twië linkerhenj.' En ouch zag ich: 'Ich höb geine aanlègk väör kaoke.' De vrouw keek mich aafkäörendj aan. Bie häör thoes kaokdje de man. Ze vónj det ich det ouch mós probere. 'Ich zat hem gewuen aan het werk achter het fornuus, as ich dich waas,' begós ze Ellie op te sjtäöke. Ich zoog de buuj al hange en mós dinke aan de miens van de vèrfwinkel. 'Aoh jao,' zag ich. 'Dan zat ich dich achter de computer väör eine roman te sjrieve. Ouch gewuen.'
2018, waek 21
