Het is mer ein klein sjträötje in Remunj, mer waal mèt ein paar sjoeën winkels väör mannemode. As Ellie en ich dao naeve loupe, kieke we aeve in de etalaasj, as we al neet nao binne gaon. Pas geleje kwome we d'r weer. Ein maedje waas in ein van de zake bezig de etalaasj op te make. Ich haopdje det d'r sjoeën haemdje in de noew collectie zote. Ein anger koppel sjtóng ouch al te kieke. Al gauw haaj ich gezeen det d'r väör mich nog gein interessante haemdje hónge. Het sjtèl naeve ós haaj waal get gevónje. Ze haje het teminste äöver ein roete haemdj. Zuuj vónj het prachtig. Hae ouch, mer dach det het väöl te deur zooj zeen.
'Det wèts se neet,' zag zuuj, 'dao hingtj gein prieskaertje aan. Zón haemdj waas ein sjoeën kado väör diene verjäördaag.' Hae sjödje mèt de kop. 'Väöl en väöl te deur. Waat ich dich bróm.' De vrouw sjneej ein sjeif gezicht. 'Te deur? Väör diene 65ste verjäördaag toch neet. En aevel, doe wèts neet èns waat de pries is.' Hae keek häör aan en zag: 'Det weit ich zoeë.' Mèt in de gang leep hae de winkel in. De vrouw keek Ellie mèt groeëte ouge aan. 'Dae is nog noeët allein eine modezaak ingegange. En dan net noe waal. Ich höb hem det haemdj al gekochtj. Mèt die bóks d'rbie.' Ze wees ein petrol-kläorige bóks aan.
'As ich hem neet aaf en toe zelf get koup,' ging ze verder, 'löptj hae iëwig róndj mèt het goodkoupste gerei oet de oetverkoup. Precies zien moder.' Ze kreeg neet de kans väör verder te klage. Häöre man sjtóng alweer boete. 'Precies waat ich dich zag. € 145. Väör ein haemdj mèt korte moewe. Dao zitj mer väör driekwaart haemdj sjtóf aan. En dan zoeë deur. Sjandalig. Zónne deure póngel draag ich nog neet al kreeg ich hem väör niks.' De vrouw keek hem mistruestig aan en vroog väörzichtig: 'Ouch neet as ich het dich gaef väör diene verjäördaag?' Hae sjnoefdje asof hae häör wool aanvlege. 'As se det toch dörfs te riskere.'
2019, waek 14
