Pas mós ich nao het zekehoes in Remunj. Dao is alles verangerdj. Väör mich is det eine ramp. Gelökkig ging Elly mèt, det ich neet zooj verdwale. Ich waerdje oet de bördjes en waegwiezers neet wies, mer Elly haaj alles drek gezeen. Dus heel ich mich veilig in zien buurt, waat hiel versjtenjig waas. Allein, waas ich zeker verdwaaldj. De sjpecialist sjtuurde mich nao het lab väör blood te prikke. Elly haaj het gauw gevónje. Mer het waas neet te doon väör zelf oet te vinje wie het systeem dao wèrkdje. Ich sjloog d'r mich mèt väöl hulp doorhaer. Wie we heivers kóste, wool ich links aaf de gank in. Elly ging nao rechts. Ich bèn óngertösse zoeë versjtenjig väör mich zónger te sjtraevele te veuge.
Elly haaj geliek. Binne de kortste kiere sjtónge we in de hal woeë we wore binnegekómme. Ich herkindje de plaats neet en wool rechts aafsjlaon. Elly trok mich mèt nao boete. Dao zoog ich pas woeë we wore. 'Och,' plaogdje Elly, 'det höbbe mier aoj manne.' Ich veuldje mich opgelaote. We lepe zjwiegendj nao de auto. Elly väörop, gelökkig. Van rechts kwoom ein net, jónk vroumes zjwejjendj op mich aaf. Het ging mich al drek get baeter. Ich dach det het maedje mich haaj herkindj en ein handjteikening wool. Det veel taege. 'Meneer,' zag het. 'Gae liektj mich noe net eine miens dae eine sjtartkabel in de auto haet.' Ich haopdje det het ein compliment waas, mer ich veuldje natigheid.
Ich höb inderdaad eine sjtartkabel in de auto, al weit ich neet wie ich dae mót gebroeke. Det zag ich ouch taege het maedje. Det waas gein probleem. Wiejer-op sjtóng eine jóng mèt eine flotte auto. Dae kós waal accukabels aansjloete, mer haaj d'r geine. Nou ja, ich goof het maedje miene kabel en vroog: 'Woeëväör dachs se det ich eine accukabel in de auto höb?' Haaj ich mer op mien tóng gebete. Sjtóm vroumes mèt ziene kabel. As het mich oeët op de kneen väör ein handjteikening baedeltj, kriegtj het d'r gein. Zoeë pienlik waas zien antjwaord.' Det höbbe alle aoj manne.'
2018, waek 40
