Ellie en ich zote op ein terras in de sjeem ónger eine boum. Het waas voel, móttig waer. Aan de taofel taegeäöver ós zat zich ein echtpaar van begin viërtig. De man mèt opvallendj witte haor drejdje zich half mèt de rögk nao de vrouw. Die keek nuetelik, deej of ze d'r neet bie huerdje en zakdje weg in het kösse van de sjtool. Ze zagte gein waord taege ein.
Het haaj gekraaktj tösse die twië en het waas nog neet väörbie.
Eine ober brach häör eder ein groeët glaas Weißbeer. Mèt in de gang kwoom ein wicht bie häör mèt krietwitte haor die alle kantje oet sjtook. Het maedje van ein jaor af zeve waas net zoeë roespelechtig as zien kapsel.
Het bleef aan het sjörge, drónk aan het beer van zien vader, sopdje eine vinger in het glaas van zien moder. Vlaog van de eine sjtool in de angere, sjpróng weer op, kraop ein minuut bie zien vader op sjoeët, mook hem óngertösse alle knuip van ziene bloes los en waas weer eweg. Waat ein energie. Allein al väör nao het kindj te kieke waas sjlopendj. De vader waas het getoervel zat. Tamelik kortaaf zag hae: 'Maedje, as ich wis woeë die batterieje bie dich zitte, haoldje ich ze d'roet.' Het wicht sjtook in eder naasgaat eine vinger. 'Hie neet, pap.' De man zuchdje. 'Höbbe wae oeët ein minuut röst gehadj mèt dich?'
Zien dochter sjödje van nae, klapdje in de henj, sjpróng op, mook eine drej in de lócht en landje net neet op de veut van zien vader. 'Woors doe mer net zoeë röstig as dien broor,' zag dae oet de gróndj van zien hert. 'Is het leuk as alle kinjer hetzelfdje zeen?' vroog het maedje. 'Jao,' zag de vader nogal fel. 'Hiel leuk, as ze normaal en röstig zeen teminste en neet doon asof ze de ganse daag op ein sjpringkösse zitte.' 'Ich wil det alle vaders hetzelfdje zeen,' kaatsdje het kindj de bal trök. 'Allemaol hetzelfdje wie de leuke vader van Björn.' De vrouw vaerdje op: 'Dao bèn ich het gans mèt èns.'
2019, waek 34
