Aafgeloupe zaoterdig haaj emes de 'kat good gevoordj'. Det is ein aoj gewuendje väör bie de hemel good waer aaf te sjmeke. Ich höb noeët aan dees ómkouperie mètgedaon, dus ich weit neet of het wèrktj. Mich tuntj det het biegeluif is en det se net zoeë good Thijs Zeelen ein gooj fles wien kins bringe. Vraog het hem zelf mer, hae zal het lichtelik mèt mich èns zeen. Efeng. Het waer kós neet baeter en dao ging het óm. Óndanks de prachtige lintjedaag zaoterdig, lepe d'r in Haelen väöl miense róndj mèt hoondervel. Neet èns van de griep, mer van gelök. Van emotie, van tamtasie, van öngeluif en van gruetsigheid. Want de aovendj van te väöre haaj Hoondervel oet Haelen het LVK gewónne.
En zaoterdig waas d'r ein sjpontaan receptie in Trefcentrum Aldenghoor, de enige cafè die het dörp nog riek is. Efkes waas het Vreigelriek het centrum van de waereldj. En efkes waas Hoondervel het hert van dit centrum. Zès gewuen dörpsjónges, degelike vaders met ein baan of ein bedrief en ein hoeshaoje, sjtónge terecht in de sjienwerpers. Want ze haje hel gewèrktj väör dit succes. Waat deej det good. Volwasse kaerels wore weer jungskes van de korte bóks en genaote van häör succes. Mèt de blieheid van ein geluivig kindj det van Sinterklaos gekrege haet waat het zich haaj gevraogdj. Mèt eine lach van oer tot oer en foenkelendje ouge sjtónge ze ein en al positieve energie oet te sjtraole. Häör bliesjap mook blie. En dao kreeg ederein nog èns ekstra hoondervel van.
Ich sjtóng mich het gedruus tösse het volk te bekieke en genaot d'r van. Door het gedrang óm mich haer kwoom d'r eine man naeve mich te sjtaon dae ich neet kós. Hae waas klein van sjtök mer probeerdje alles mèt te kriege. Ich knikdje. 'Dit meuks se noeët mier mèt,' zag ich. Hae wiebeldje get mèt zien henj en sjödje ziene kop. Asof hae mich neet versjtóng. Ich herhaoldje mien wäörd. Mer hae keek mich hulpeloos aan en zag: 'Ik weet niet wat er gaande is, maar hier krijg ik kippenvel van.'
2019, waek 8
