Hae waas tummerman en getrouwdj mèt Maria. Ze ginge door waer en windj mèt eine aezel nao Betlehem. Dao waerdje Jezus gebaore. Zoon van de Heilige geist, dae Maria as doef haaj bezjwangerdj. Jozef erkindje het wicht en zorgdje väör hem. Hae mót dus eine goje miens zeen gewaest.
Toch haet hae in het christelik geluif altied op het twiëdje plan gesjtange. Asof de kèrk zich sjaamde väör häör eige verhaol. Geine eine paus haet zich de naam Jozef aangemaete.
Dao zeen naovenantj min kèrke nao hem verneumdj. Kathedrale amper. Mer noe haet de brave tummerman de plaats die hem toekumtj opge-eistj, baove-aan de leijer van heilige.
Ein paar jaor geleje wore Elly en ich bie kinnisse in Venraoy. Dao huerdje wae väör het ierst det Jozef allewiel in het ónreurendj good zit. Vrinj van ós kinnisse kóste häör hoes neet kwiet waere. Ze krege het advies väör ein beeldj van Jozef väör in de haof in de gróndj te grave. In ein hou mou wore ze van häör hoes aaf.
In Vènraoy en ómgaeving waerdje gein hoezer mier verkóchtj zónger ingegrave jozefbeeldj in de haof. Dus wie oze zoon en sjoeëndochter meute haje väör häör hoes kwiet te waere, vertèldje wae häör äöver Vènraoy.
Ze deje d'r lacherig äöver, mer begrove toch häöre Jozef oet de kerstgroep in de haof. Ein prachtig beeldj van glazuur.
Het hoes waas zoeë verkochtj. Mer ... het beeldj waas neet mier te vinje en is noeët mier gevónje. Lichtelik is die verdwiening de wraak van Jozef det die twië de draak mèt hem as makelier haje gesjtaoke. Efeng. Pas geleje haje vrinj van ós häör hoes te koup sjtaon.
De verkoup leep neet hel. Op aanraoje van Elly en mich grove ze ein Jozefbeeldj väör in de haof. Det leverdje kiekers zat op, zelfs eine kuiper, mer dae trok zich trök wie hae eigelik al gekochtj haaj.
Gelökkig wis emes de oplossing. Het beeldj mós op de kop in de aerd gezatte waere. Wie oos vrinj det deje, waas de kuiper zoe gevónje. En Jozef dees reis ouch. Het loestertj zich nej.
2018, waek 18
