Kèrmis, det is toeters, sirenes en muziek. De räök van sjlók, gebakke vès, boetsauto’s. De geur van doezendj saorte parfum en after shave. Miense te voot, in kinjerwages, achter rollators of in rolsjteul. Vrouluuj en maedjes, mansluuj en jónges. In saorte en maote, van alle laeftieje en in alle kläöre. Lank, kort, diek, dun en alles dao tösse-in. Zjwaor opgemaaktj of naturel. Half naaks of degelik geklèdj. As se dao tösse wils opvalle mós se echt get oet de kast haole. Paars of oranje gevèrfdje haor wèrktj neet mier. Groeëte gater in de bóks ouch neet. Rock & Roll klèdjes oet de jaore fieftig mèt wiej petticoats? Leuk, mer opvalle? Nae.
Det deje waal twië jónges van ein jaor of zèstiën. Eine waas broeëdmager en bekans twië maeter lank. De angere hoeëgoet eine maeter fieftig en móddervèt. Ze wore gans in het zjwart, haje de haor hoeëg opgesjaore. Op het midde van de kop sjtóng nog ein klein paekezjwart börstelke. Rechtop, sjtief gesjpaote mèt gel. De lange haaj eine sjtevige rink door de naas. Asof hae sjnachts op de koesjtal aan de kètting mós. De korte haaj ein anker in zien rechteroer. Ein sjtevig sjtök sjmeedwerk woeë se gemaekelik eine roeëjboeët mèt kós vastligke.
Ze sjtónge same geldj te tèlle. De lange haaj de beurs vast en sjtóng väöräöver geboektj. Mer inèns bloos de windj ein breefke van vief oet de beurs weg. De lange heel van sjrik de beurs half óngerstebaove. Kleingeldj klaoterdje äöver de gróndj. Ze daoke allebei nao ónger. Det waas het begin van ein ónmäögelik óngelök efkes later. Wie ze tegeliek ómhoeëg wole kómme, bleef de korte mèt zien anker hange in de naasrink van de lange. Dae haaj niks in de gate en trok sjtevig door. As de korte minder zjwaor waas gewaest, haaj de lange hem gemaekelik aan de naas opgehöfdj. Noe trok de korte door zien gewicht de lange mét de kop nao ónger. Gelökkig kreeg de korte zien anker gauw los. Ze mótte pien höbbe gehadj, det kan neet angers. Mer ze wore ouch aeve de sjoeënste attractie van de kèrmes.
2018, waek 22
Mier aktueel kolumns: www.fritscriens.com
