ColumnsDinsdag = MODERTAAL ...iedere week online

LEKKER

Lekker op vakantie. Lekker waer. Lekker sjlaope. Lekker fietse. Lekker niksdoon. Lekker wèrke. Het waord 'lekker' is ein saort joker, väör bekans alles te gebroeke. Det liektj lekker gemaekelik. Liektj, want det is lang neet altied waor. As ein broed zaet: 'Det waas ein lekker huweliksnacht,' kan det twië dinger beteikene die precies taegeäöver gesjtèldj zeen. Het hingtj d'r mer van aaf wie ze het zaet. En as de broedegom te huere kriegtj: 'Doe bès eine lekkere,' mót hae good nao de toeën loestere of het ein compliment is of ein verwiet. Lekker dudelik, hé! Ich kwoom op dees gedachtes wie pas emes zag: 'Nao de crematie zeen we lekker gewaest wanjele.'

 

Het mankeertj d'r nog mer aan det gezagdj kan waere: 'Het waas ein lekker begrafenis.' Al zal dees zin nemes vraemdj in de oere klinke: 'De begrafenis leep neet lekker.' Efeng, mèt 'lekker' kins se lekker alle kantje oet. Zoeë zitj het eine houp miense neet lekker det Volkert van der G. het landj oet is woeëdoor hae weer lekker in zien vel zitj. Wie hae de bak in mós, vónj ederein det 'lekker zien verdeendj loeën.' Want het is natuurlijk geine lekkere jóng. Of hae lekker ligktj in zien familie? Aete mót lekker zeen. Lekker vèt of lekker mager, lekker zeut of lekker pittig. Mer het kan taegevalle. Ein sjtök vleis kan d'r lekker oetzeen en lekker ruke mer aeve good neet lekker mals zeen of lekker sjmake.

 

Pas geleje zoot Ellie aandachtig in eine folder te kieke. Inèns kraop het lekker op miene sjoeët en leet mich ein foto kieke. Op ein prachtig cruisesjeep loge aantrèkkelike, jóng dames lekker in bikini te zónne. Ich wis waal woeë Ellie haer wool, mer zag ónuezel eweg: 'Dao hove wae gelökkig neet tösse te ligke.' Ellie zag nuetelik: 'Doe bès echt aod aan het waere. Liëtj ein romantiese cruise mèt zón lekker gezelsjap dich al kaod?' Ich haoldje mien sjouwers op en zag: 'Doe bès mien lekker gezelsjap, of wils se mich lekker make?' 'Phoe,' zag Ellie, 'dich lekker make? Det löktj nog neet mèt eine ummer sjlaagroum.'

 

2018, waek 42 

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.