Ellie keek mich vraemdj aan. Asof het mien vraog mer half haaj versjtange. Dus ich zag het nog èns: ‘Zulle we lekker gaon winkele in Wiërt?’ Ellie lag mich väörzichtig ein handj väör de kop. Mer ich haaj gein koorts. Ouch gein pan los. Dus ich zag: ‘Wiërt is ziene tied wied väöroet. Waat ze in anger sjtaej godzijdank höbbe aafgesjaftj, is in Wiërt opnoew oetgevónje. Dao drejje ze muziek in het winkelcentrum.’ Ellie waerdje d’r sjtil van. Konstant muziek in de binnesjtad? Waat ein genie väör op die gedachte te kómme! Van winkelcentrum tot koppiencentrum. En det oetgevogeldj in Wiërt.
Ich dink det het zoeë is gegange: De eine nao de angere winkel in Wiërt mót sjloete. Laeg winkels trèkke gein volk. Dus kwoom d’r ein commissie mèt versjtandj van laeg winkels. ‘Waat is het probleem mèt ós centrum?’ vroog zich emes hel-op aaf. En de sjlumste zag: ‘Dao zitj geine muziek in.’ Ze keke zich óngerein aan, asof ze de geist van graaf Filips haje gezeen. Geine muziek! Det waas het! Dao mós muziek kómme Ein centrum vol muziek, meuktj de middesjtandj weer riek. Mèt veur en iever ginge ze aan de sjlaag. Mer ierst mós d’r ein enquete kómme. Zónger insjpraok kins se nog geine sjtoeptegel verligke. Ouch neet in Wiërt. 3000 man waerdje nao häör meining gevraogdj: waal of geine muziek in het centrum? 1% -dus mer dertig miense - goof antjwaord. En van die dertig waas d’r eine väör. Eine!
Mer eine miens van de 3000 die zeen gevraogdj, wiltj muziek in de binnesjtad van Wiërt. En toch liëtj die commissie van sjlummerike häör ónzalig idee doorgaon. Die paar miense die waal nog winkele in Wiërt kriege noe väör sjtraof herrie aan de kop woeë ze neet óm höbbe gevraogdj. Det väöroetzicht zal massa’s noew volk aantrèkke. Zeker weite. Laot die commissie mer drek äöveral parkeerplaatse biemake. Angers mót het muzikale winkelpubliek de auto örges bie de Iezere Man neerzitte. En dan loupe ze ónnuedig eine houp prachtige muziek mis. Want väör de muziek geis se natuurlik nao Wiërt winkele. Ellie en ich väörop!
2018, waek 27
