Maondjigmörge. Ich sjrief aan mien sjtökske, mer mien gedachte dwale aaf nao Naer. Net wie vreuger, as ich weer èns verleefdj waas op ein maedje oet det dörp. Gisteraovendj ginge Ellie en ich nog fietsendj van dao-oet heivers. Boete is het get grauw. Zeker neet het prachtig waer van de aafgeloupe drie daag. Toen waas de zón het sjtraolendj middelpuntj aan de hemel. En hie ónger? Dao waas Naer het sjtraolendj middelpuntj van Limburg. Doezendje sjötters, manskaerels en vrouluuj, oet gans Europa kwome in het Maasdörp bie-ein väör te vere det ze sjötter zeen. Väör zich mèt häör vereiniging te presentere aan het publiek. In de optocht natuurlik, eine lange, bedwelmendje sjtoet van kläör en meziek. Mer ouch op het fiëstterrein.
Dao gebäördje drie daag lang get, boete het offisjeel program óm, waat se väöraaf neet kins regele. Waat se ouch neet kins aafdwinge, woeë se allein mer op moogs haope. Get waat sjpontaan óntsjteit as miense van goje wil bie-ein kómme. Ein leed van bienao twiëhóngerd fieftig jaor aod kwoom letterlik en figuurlik tot laeve: Ode an die Freude, gesjreve door Friedrich von Schiller (Lofdicht aan de vreugde) De prachtige regel ‘Alle menschen werden Brüder’ hóng wie eine besjermingel äöver het fiëst. Wildjvraemdje kaldje, lachdje en zónge mèt ein. Moke plezeer, lete foto’s kieke van thoes, ginge mèt ein op de foto. Mèt veer wäörd Ingels, drie wäörd Duits en twië wäörd dialect lökdje het miense te kalle mèt Pole en Oësteriekers.
Mèt väöl henj en veut en väöral mèt nog väöl mier goje wil lagte sjötters oet de Oekraïne oet woeë ze vanaaf kwome. Woeë ze mèt die daag sjlepe. Het EST in Naer waas väöl mier as ein mega sjöttersfiëst. Het mook van Naer aeve ein centrum van internationale verbroedering. Ein fiëst väör ederein van goje wil. Hiel lang geleje sjreef ich ein groeët toniëlsjtök väör Naer det boete aan de kèrk is opgeveurdj. In ein van de leedjes sjtóng dees regel: ‘Naer, Naer, Naer, waat ich zooj wille … iëwig blieve laeve in dien idylle.’ Afgeloupe weekend höb ich ein sjtökske van die iëwigheid mètgemaaktj.
2018, waek 34
