1 januari 2019. Noejaor. Het is ein bietje eine rare daag väör mich. Döbbel hètj det allewiel. Mien moder zooj vandaag jäörig zeen gewaest. Ze is op ein vervaelendje maneer veróngelöktj. Zeve-ensestig waas ze, in de bloom van häör laeve. Ze kwoom oet ein hoeshaoje van zeve maedjes en drie jónges. Ermood in de Ospelse Piël. Ein deil van häör breurs en zösters zeen te jónk gesjtorve. Het anger deil is sjtraot-aod gewaore. Eine broor laeftj nog. Die van het sjterk deil zeen sjtök väör sjtök in de negetig gewaore. Mam huerdje tot die gezónj hèlft. Mer ja, ze kós neet winne van eine opgefokdje brómfiets dae häör mèt geweldj äöverhoup reej. Zuuj haaj gein sjöldj, mer dao kiektj het laeve neet nao. Toch veultj het nog altied aan wie ónrecht, det ze zoeë is mótte gaon. Mer waat is ónrecht as het äöver laeve en doeëd geit?
Noeëdlot is ein baeter waord. Óngertösse höb ich vree mèt het noeëdlot van mam. Mer häöre verjäördaag op zónne sjpeciale daag wie Noejaor haoltj alles opnoew dun bie. Toch dwing ich mich väör neet te väöl bie häör óngelök sjtil te sjtaon. Waat det betruftj is Noejaor dao eine gunstige daag väör. We kieke väöroet nao de toekomst en höbbe gooj väörnummes, zeen optimisties. Vere fiëst, gaeve hendjes, kösse ós óngerein en winse ós taege-ein het bèste. We doon asof het noeëdlot neet besjteit, al weite we natuurlik waal baeter.
Dit jaor waas miene Noejaor net weer get angers as anger jaore. Det kwoom door het verhaol van eine aod-collega oet Vènlo woeë ich aan mós dinke. Hae waas aafgeloupe jaor mèt zien vrouw van aod op noew op wintersjport in Pruses. Aodjaorsaovendj veerdje ze mèt het gans hotel. Het aaftèlle nao het moment det het ein jaor äöverging in het anger, deje ze boete. Natuurlik mèt glühwein woeë ze al zat van ophaje. Zien vrouw kösjdje hem en winsdje hem ein goje roetsj. Roetsje waas het ierste waat hae deej! En good: de rechterbein in de gips. Achteraaf kós hae d'r mèt lache. Het noeëdlot haet ouch geveul väör humor.
2019, waek 1
