Paoszaoterdig mós ich óm twelf oer sjmiddes aan mien sjoeënvader dinke. Det waas het inj van de vaste. Vaste: zès waeke lang achterwaege laote waat se gaer duis. De vastepot woeë kinjer häör sjlók in móste beware tot Paose is ein symbool väör die verlaore traditie. De meiste katholieke van 50-plus höbbe d'r allemaol häör eige verhaole äöver. Paoszaoterdig óm twelf oer kwome de klokke trök oet Rome. Ze beierdje äöver het landj det de vaste waas aafgeloupe. Dan waas het fiëst en moch de vastepot aop. Doorein veel det taege: zeute lekkertjes zote aanein geplektj en keukskes wore tej of verkruumeldj. Of het bèste sjlók waas weg, omdet ein broor de verleiding neet haaj kinne weersjtaon en oet diene vastepot haaj gepikt. Klein leid.
Jeugdsentiment oet de tied det 'Gelök nog gans gewuen waas'. Det nog neet in eder hoeshaoje eine televisie sjtóng en det de gemiddeldje laeftied ein hiel sjtök lieger loog as noe. Neet allein kinjer móste zich in de vaste get óntzègke. Ouch volwassene deje dao aan mèt. In mennig hoeshaoje waerdje d'r sjraol gekaoktj, waat aan het inj van de wintjer troewes dök neet angers kós. Zoeë wie zoeë moch op vriedig gein vleis op taofel kómme. Oetgaon väör de aojer jeugd waas zès waeke taboe. Danszale bleve gesjlaote. Allein mèt half vaste ging de dèksel aeve van de kaetel.
De meiste mansluuj roukdje nog wie eine sjaorsjtein. Neet ederein kós het opbringe väör zich in de vaste de tabak te óntzègke. Mien sjoeënvader deej det waal. En heel det vol. Det höb ich van huere zègke, want ich kós hem in dae tied nog neet. Mer het waas zjwaor väör hem. Paoszaoterdig zoot hae mèt de sigarette klaor tot de klokke oet Rome ouch baove Liëuwe begóste te loeje. Det waas het signaal väör aan te valle. De ein sigaret nao de anger ging in rouk op. Echte geluivige hele zich neet allein aan de regel van het vaste mer ouch aan de ónthaojing. Geine seks dus. Wie zal det d'r in die hoeshaojes op paoszaoterdig óm twelf oer aan toe zeen gegange?
2019, waek 17
