Elly en ich wore pas op eine verjäördaag. Man en vrouw veerdje det ze allebei 70 wore gewaore. We zote nog neet tegooj aan het ierste glaas wien, beer of fris wie emes reep: 'Waat tuntj uch van André Hazes?'
Asof emes mèt eine sjtek in ein biejenèst reurdje.
Zoeë begós het te gónze in de kamer. Ich dach: Waat noe? Hazes is toch al lang doeëd. Mer ich haaj lichtelik get gemistj de aafgeloupe jaore. Väör André senior zaliger is André junior in de plaats gekómme. Ich leep behuerlik achter. Väör op de huegdje te blieve is het daoväör good det alle verjäordaag geveerdj waere. André Hazes junior. Op het fiëst wore de meininge äöver zien zangkwaliteite verdeildj. De meiste miense vónje zien vader baeter.
De muziek van Hazes senior haet mich noeët kinne bekore. Dus ich waas al blie det ich dae van André junior haaj gemistj. Mer het ging neet äöver de muziek. Het bleek det André junior en zien vrouw oetein zeen. Noe sjtóng ich dao neet van te kieke. Het leefdjeslaeve van väöl BN'ers is eine soap. Ich höb ónthaoje det de verlaote vrouw Monique hètj. En ouch det zuuj en André junior eine zoon höbbe. Wie dae hètj weit ich neet mier. Mer mook het gezelsjap zoeëväöl gedruus ómdet twië BN'ers oetein wore? Det kós ich mich neet väörsjtèlle. Dus ich zag taege de man rechts van mich: 'Het is toch neet bezunjer det BN'ers oetein gaon. Hae zal waal ein jónger dink gevónje höbbe.'
'Juust neet,' waas het antjwaord. 'Hae hèltj zich noe op mét Bridget Maasland.' Dae naam zag mich get van hiel lang geleje wie Bridget väör BNN wèrkdje. Dus ich vroog: 'Wie aod is det Maasland óngerhandj?' '45,' wis de gastvrouw aan de anger kantj van mich. 'Van 9 november, miene Thuur is op de daag aaf 25 jaor aojer.' 'Mesjien mót André junior het op eine aoje fiets liëre,' zag de man naeve mich tamelik óndoordachtj. Ich keek de gastvrouw gesjrókke aan. Mer die versjödje gein oer en zag: 'Dan hooftj het toch nog geine omafiets te zeen.'
2019, waek 47
