Sinterklaos en de Kerstman. Ze höbbe het neet gemaekelik. Daoväör kwome ze pas geleje bie mich thoes in het geheim bie-ein. Van Sinterklaos waas niks mier äöver. Hae zoog d'roet wie ein aod menke. Det gedoons mèt zien zjwarte Piete haet hem knuip gekostj. En het gezanik hèltj mer neet op. Hae vertèldje mèt gebraoke sjtum waat hem het ergste sjörgdje. Eine noewe actiegroep meuktj zich dieke bein äöver het paerd. Woeëväör is det paerd wit? Det is puur racisme want wit is de kläör van de blanke sjlavedriever. De kläör van de äöverheerser. De kläör van de óngerdrökker. De kläör van de macht en het geldj. Mèt zien wit paerd lietj Sinterklaos, net as mèt zien Zjwarte Piete, zeen det hae eine racist is.
Ederein dae broeëd of maore väör het paerd in de sjoon duit, is ouch eine racist. Det begintj al jónk, volges de actieveurders. Ze eise ein zjwart paerd, of ein broen. En eigelik eise ze gaaroets gein paerd, mer eine aezel. Det biest waas good genóg väör Jezus. Woeëväör dan neet väör Sinterklaos? Aezels höbbe troewes de gooj kläör. Gries. Det is precies tösse zjwart en wit in. Dao waertj ederein blie van. Teminste as se van goje wil bès. Sinterklaos kós waal bäöke wie hae het allemaol vertèldje. 'Doe höbs het ein sjtök maekeliker,' zag hae taege de Kerstman. Wie duis se det?' De Kerstman kratsdje zich door de baard.
'Ich mót dich taegesjraeke, Klaos. Het is neet waat se dinks. Ouch de Kerstman is allewieles de pispaol van ederein dae precies wètj waat angere mótte doon en laote. Ze höbbe oetgeraekendj det ich eine groeëte miljeucrimineel bèn. De kadoos die ich róndjbring, mótte ierst gemaaktj waere en dan getransporteerdj nao mien pakhoeze. Doe wils neet weite wieväöl vervoeling det oplevertj. Dao kan Sjiphol neet taege-op. Döks kómme dao ouch nog kinjerhendjes aan te pas. En daobie: mien rendere jakkere ein paar waeke achterein de ganse waereldj äöver. Röst kriege ze amper. Dus ich bèn ouch nog biestebeul. As ich het allemaol kós äöverdoon, wis ich het waal. Ich lierdje mich ein vak.'
2018, waek 51
