Ellie en ich lepe in de tied van het offerfiëst ein paar waeke geleje in Remunj ein terras op. Het waerdje hoeëg tied det we ós effe get kóste bekómme. Het was werm en benauwdj. We zeen het al intrintj vergaete, mer we höbbe eine bloodheite zomer gehadj. Op het terras wore amper gooj plaatse vrie. In de zón gaon zitte waas zelfmaord. Aan ein täöfelke in de sjeem zote eine vader met ziene zoon. We kóste häör good genóg väör te vraoge of we ós d'rbie mochte zitte. Det moch. Ze wore flink doonde met ein zjwaor gesjprek äöver het klimaat. Ein óngerwerp det deze zomer väör ein noew generatiekloof haet gezorgdj. Vader en zoon wore het neet èns mèt ein.
De zoon vónj det d'r maotregele móste kómme taege het opwörme van de aarde. De vader waas dao ein bietje nuetelik äöver. 'Verdomme,' zag hae op ein gegaeve moment zoeë hel det de miense óm häör haer opkeke. 'Ich bèn mien half laeve 's zomers nao Frankriek, Sjpanje en Italië gereje väör wörmdje en zón. Noe höbbe we det eindelik zelf, en noe wils doe dao väör väöl geldj ein inj aan make.' Ich begreep dae miens, zelf haoj ich ouch van lekker werm zomers. Väör neet in häör discussie mètgetrokke te waere, bekeke Ellie en ich kwansies de beerkaart. Nao de oetval van de vader waas het effe sjtil.
Väör ós langs leep ein gruupke vrouluuj in lang sjorte en eine kopplak óm. Ze droge zjwaor tasse. De vader zag: 'Ich dach det die moslims offerfiëst haje. En noe zeen ich d'r zès van het Outlet aaf kómme.' De zoon keek hem raar aan. 'Offerfiëst? Waat is det?' 'Het inj van ein saort vaste,' zag de vader.' Ich mós mich inhaoje väör hem neet te verbaetere. 'Wae vasjdje vreuger tösse Aswoonsdig en Paose,' verduutsje de vader. 'Waat deedj gae dan, pap?' Pap haoldje zien sjouwers op. 'We deje niks. We mochte allein zès waeke lang gein vleis aete, neet oetgaon en geine seks höbbe.' De zoon kuumdje. 'Geine seks? Dan höb ich al vief jaor vaste!'
2018, waek 36
