In oos sjtraot waertj het aod tennispark aafgebraoke. De kantien waas beruchtj. Haaj ze kinne sjpraeke, dan haaj ze vertèldj äöver tennissers die nao eder glaas beer baeter waerdje. Äöver oerelang discussies of eine bal noe in of oet waas gewaest. Äöver koppels die waerdje gevormdj of juust oetein vele. Noe mótte we het doon mèt de verhaole van de tennisers zelf. Nog beruchdjer dan de kantien waas baan twië, die aan de kantien loog. Op het terras zote altied lestige men mèt lestig commentaar. Ich weit zeker det d'r sjpelers zeen die het gelach van baan twië nog altied huere in häör kwaoj druime. Waem neet taege de sjtres van baan twië kós, waas al op väörhandj verlaore. As baan twië kós vertèlle!
Beväörbeeldj äöver de groeëtste kampioen van de club. Eine sjportieve miens dae eder jaor weer kampioen waerdje. Hae wool gaer det emes angers èns mèt die ier ging sjtrieke, mer nemes waas good genóg. Det jaor sjtóng hae sunjes weer in de finale. Wie hae 's zaoterdes heivers ging, veel hae in het duuster óngenadig hel van ein aafsjtepke. Hae drónk geine alkohol, dao loog het neet aan. In het zekehoes vónje ze gekneudsje rubbe. Ouch waas zien half gezicht kapot. 's Nachts deej hae gein oug toe. Mer oet sjportief plichtsgeveul sjpeeldje hae de finale toch. Hae kós amper loupe en sjtóng binne de kortste kiere op verlees. Nog eine game en dan waas d'r eine noewe kampioen. Ein jónk menke mèt ein vlaotmoel.
Bie het wissele van hèlft zag hae, hel genóg det het publiek op baan twië en de geblesseerdje kampioen het kóste huere: 'Zoeë, noe höb ich dae aoje zak te pakke.' Welke krachte die opmerking in de 'aoje zak' haet wakker gemaaktj? Waem zal het weite. Inèns ging hae wie eine jónge god aan het tennisse. De vlaotmoel kreeg gein puntj mier en ging mèt ein gesjèldj sjtekske heivers. Het is ein waor verhaol woeë ich dök aan mót dinke. Äöver ein paar maondj waer ich seventig. Ein aoje zak, mer laot het nemes riskere väör det helop te zègke.
2018, waek 3
