Ellie en ich lepe trök nao de fietsesjtalling in de Neersjtraot. Het waas intrintj Sinterklaos. Dan wiltj ederein zien kadoos op tied bie-ein höbbe. Ich haaj last mèt loupe, vanwaege miene linkerbein. Daoväör mós ich aaf en toe effe sjtilsjtaon väör bie te kómme. Ich sjnap noe woeëväör det etalage-bein hètj. Dees reis sjtóng ich sjtil väör de etalaasj van eine tattoo-shop. Eine groeëte vinger op ein bord wees det de zaak aop waas. Naeve ós sjtóng ein echtpaar. Get jónger as Ellie en ich, dus eigelik nog hiel jóngk. Väöral de man waas zich flink aan het sjteggele mèt zien vrouw. Lichtelik woeëndje ze örges op de hei woeë se vrie kins kalle zónger det emes mètloestertj. Ze deje in eder geval neet häör bèst väör het probleem get ónger häör beie te haoje.
Al gauw genóg haje Ellie en ich de draod van häör discussie te pakke. In häör hoeshaoje haje ze breefkes getrokke. Dao sjtóng de naam op van degene dae het kado zooj kriege. En ouch welk kado Sinterklaos hem mós bringen. Neet sjpannendj mer waal altied good, zoojs se dinke. Toch neet. De vrouw waas gesjlaagdj. Mer de man mós get aansjaffe väör ziene zoon woeë hae geine waeg mèt wis. De jóng haaj zich namelik ein kadobón gevraogdj van de tattoo-shop woeë zien aojers zich väör sjtónge te sjtraevele.
De man verrèkdje het, zag hae, väör zien good geldj aan dae ónzin oet te gaeve. Of dach de vrouw det hae neet richtig tikdje? Ze kóste hem allemaol de rögk op. Hae betool gein tattoos. En zeker neet de tattoo van ein ziëmeermin róndj de navel. Ze zoje hem as vader waal väör gek verklaore. De vrouw zag det hae neet mós aordeile äöver het kado waat häör Wim zich haaj gevraogdj. En ouch det häöre miens nao binne mós gaon väör die kadobón te koupe. Zoeë bleve ze taege-ein hetzèlfdje herhaole. Het sjaot neet op. Tot de man zag: 'Gein tattoo van mien cente. Det Wimke zich det naaks vroumes mer zelf óm ziene navel kratstj. De graof naoldj hingtj d'r ónger.'
2018, Waek 49
