Efkes kort get äöver michzelf vertélle väör begriepeliker te make waat daonao kumtj. Ich bèn as óngerwiezer begós mer höb wie ich wèrkdje de aktes MO-A en MO-B gehaoldj väör het vak Nederlands. Daomét höb ich jaore lesgegaeve aan het MBO väör de afdeilinge Administratie, Besjtuur, Secretarieel en Logistiek. En ouch höb ich jaore lesgegaeve aan hoeëg opgeleidje (ex)boetelenjers, volwasse vrouwe en manne die oos taal good móste liëre väör in häör beroep wiejer te kinne.
Dit äöverkwoom Ellie en mich de väörige waek in Haarlem. De iërste aovend haaj Ellie örges ein aettaofel geregeldj. We zote nog neet lang wie eine dónkere man op ós aafkwoom. Hae haaj ós huere kalle en vroog väörzichtig of wae oet Limburg kwome. Dao hoofdje we neet väör te lege. Hae goof ós ein handj en zag: 'Ich bèn de enige Surinamer dae plat kan kalle.' En toen begós hae te vertèlle det hae in Wiërt haaj gewèrktj en in Heitse. Hae neumdje alle zale en cafés in Limburg op woeë hae as zanger en gitarist haaj opgetraoje. En hae kós väöl Limburgse bands en de muzikante die dao-in sjpeeldje. Hae waas troewes mèt ein Oekraïens maedje getrouwdj.
Sangerdaags ginge we nao de Sint Bavo, ein kèrk die in de 80-jäörige aorlog door de beeldjesjtormers vanbinne is geruïneerdj. Ich vroog ein paar dinger aan de mevrouw achter de kassa. Wie we wole doorloupe zag die: 'Mag ik vragen uit welk land u komt?' Ich höb häör lichtelijk sjtóm aangekeke want ze zag: 'Voor de subsidieaanvrage.' Ich zag: 'Ons vaderland is de dichtstbijzijnde buurman van Nederland ... wij komen uit Limburg.' De vrouw versjaot wie ein kreeft in kaokendj water. Ein paar miense die het haje gehuerdj, lachdje zich kepot. Ich kreeg kòmpassie mèt häör en ging d'r neet wiejer op in. Later waerdje we in de VVV-winkel geholpe door ein aardige vrouw. Het kwoom toevallig zoeë oet det ich häör kós vertèlle waat mich iërder waas äöverkómme. 'Oh,' zag ze, 'niet erg'. Ich wool häör vraoge waat ze precies bedoeldje. Mer ich zag niks. Zooj det toch kómme ómdet ich Limburger bèn?
2026, waek 22
