Pas geleje kwome Ellie en ich in Stramproy oet bie de Mäöle van Nijs. We lepe nao binne en waerdje opgevange door ein maedje van groep acht. Het wis hiël väöl te vertèlle want zien oma waas vriewilligster op de mäöle. En het zelf haaj d'r ein wèrksjtök äöver gemaaktj en dao ein sjpraekbäört äöver gehaoje. We troffe het dus. Ich waas äöver ein smaal trap nao de baoveste verdeping gegange en kwoom trök nao ónger. Het maedje greep drek in. En het haaj geliek: Ich leep verkiërdj óm het trepke aaf. Mèt het gezicht nao väör en det mós precies angersóm, mèt het gezicht nao de trap.
Dao mós ich aan dinke wie ich pas in Bieëgdje waas op de Sint-Lindertmäöle. De mulder vertèldje iërst het ein en anger väör we boete-óm äöver ein lang trap nao baove ginge väör het loupwerk te bekieke. Dao is aan de boetekantj ein saort wachthuuske mèt oetzicht äöver de ómgaeving. De mulder haaj het ein sjoeën verhaol nao het anger. Wie we weer nao ónger ginge, waarsjuuwdje hae: 'Dink d'raan, achtersteväöre.' En toen vertèlde hae äöver eine stagiair dae det neet deej. Hae litsdje oet, boedeldje äöver de trap nao ónger en kwakdje taege sjtevig, zjwaor houtwerk aan. Äöver de versjrikkelike gevolge zal ich hie zjwiege. Ein verhaol van de mulder det mich het meist aangreep wil ich uch aevel neet ónthaoje.
Hiël lang geleje haaj de mäöle eine brave, katholieke mulder mèt ein groeët hoeshaoje. Dae miens verdeendje iërlik de kost. Mer eine van zien klantje waas protestant. Det kós neet, volges de pesjtoeër van Bieëgdje. Vanaaf de praeksjtool reep hae de boere van zien parochie op väör häör kaore örges angers te laote male. Zónne oproop waas eigelik ein gebod. Waem neet loesterdje, goeëdje zien eige roete in. De boere bleve weg van de mäöle en het leep sjlecht aaf mèt de mulder en zien hoeshaoje. En de pesjtoeër? De mulder dach det dae zeker neet in de hemel zoot. Ich zooj het hem höbbe gegundj as hae verkiërdj-óm äöver de trap nao hèl waas gegange. Mèt losse henj.
2024, waek 38
