Het waord moge haet versjillendje beteikenisse. 'Ich moog dich waal,' is 'Ich vinj dich aardig'. 'Moog ich ein óns ruikvleis,' is ein nette maneer van besjtelle: 'Ich wil gaer ein óns ruikvleis höbbe.' 'Ich moog lieje det Trump iërst naodinktj väör hae mèt bómme begintj te goeëje,' dröktj haop oet. Ich höb het idee det 'moge' in dees beteikenisse allein nog gebroektj waertj door aojer generaties. Allewiel is 'moge' väöral ein saort sjmaermiddel as de sjpraeker vruntjelik, neet bazig wiltj äöverkómme.
Gisteraovendj begós Ellie mèt kaoke. Ich mook de greuntje zuver, paor, ein paar maore en ein dieke ooj. Wie ich klaor waas, vroog ich: 'Kan ich nog get doon?' Het antjwaord waas: 'Doe moogs de pedaalummer laegmake in de grieze container en het aafwasmesjien effe laeghaole. Mós ich mich veriërdj veuldje det ich toesjtumming kreeg väör det allemaol te moge doon? Ellie bedoeldje natuurlik: 'Maak ouch effe de pedaalummer en het aafwasmesjien laeg. Mer det klinktj al gauw as 'mótte', as ein verplichting of commando. Väör het dwingendj karakter te verzaochte, gebroeke miense dan lever het waord 'moge'. Daomèt waertj geine dwang opgelagdj, mer väör het geveul toesjtumming gegaeve väör get waat mót gebäöre. Ich begriep det waal mer het klinktj vraemdj.
Pas waas ich in het zekehoes. Wie ich aan de bäört waas, ging ich iërst ein kleidhok in mèt twië däöre. Emes klopdje op de anger däör en kwoom nao binne, ein aojer doktersassistente. Ze vroog miene naam en gebaortedatum, vertèldje det ich zoeë aan de bäört was en zag: 'Gae moogtj de jas alvast oetdoen.' Whauw. Waat ein gelök det ich det zoeë mer mog. Ich haaj waal ein sjtreepke väör bie dees dame, want ze keek op ein formulier en zag: 'Gae moogtj ouch uer baovelief bloeëtmake en de sjoon en de bóks oetdoen.' Waat ich neet allemaol mog van die dame in det klein paskaemerke. Woeë haaj ich det aan te danke? Väörzichtig vroog: ich 'De óngerbóks ouch?' Häöre blik verrooj häör gedachte: 'Dao höbs se d'r weer zoeë eine.' Ze leep weg en zag mèt ein vals sjtumke: 'Zeker ... det moog.'
2026, waek 17
