5 feb 2019ColumnsFrits Criens

KITTIG

Haelen

Ellie en ich zote in Mesjtreech in ein koffiehoes. Ein paar täöfelkes van ós aaf zoot ein jónk koppel. Ze haje ein glaas wien väör zich sjtaon en wore drök aan het kalle. Neet verleefdj, ierder nuetelik. Het waas neet te versjtaon woeë het äöver ging, waal te huere. Ich zoog wie ze häör bèst deje väör zich taege-ein in te haoje. Dinkelik väör de sjanj van de miense óm häör haer. Die hele häör sjtilkes in de gate, waat des te mier opveel. Het maedje haaj de voeste sjtevig toegeknepe op de sjoeët. Het sjaot aaf en toe mèt zien gans lief nao väöre. Asof het dae jóng aan wool vlege. Ein kittig dink, zooj mien moder gezagdj höbbe.

 

De jóng leek mich eine druege. Waat haaj hae gedaon det het kittig dink hem de ouge zooj wille oetkratse? Want dao leek het gesjprek óngertösse waal op oet te loupe. Mesjien haaj hae niks gedaon en waas det het probleem. Waas hae neet kittig genóg en wool het maedje hem daoväör aanvlege. Het waas natuurlik oetgekeke op dae druege. Ze haje ein probleem mèt häör versjillendje temperamente. Die twië pese gewuen neet bie-ein. Det zoog ich aan alles. Het maedje waas neet allein ein kittig dink, mer ouch nog èns geine póngel. Zooj mien moder gezagdj höbbe. Det kós waal eine angere vriejer kriege. Het haaj de vuust óngertösse al op de taofel ligke. En dae jóng?

 

Ich vónj hem ein saort Belsj dae van het semenarie is gesjtuurdj. Het waas in de wäörd van mien moder eine richtige sopsieme. Mer of ich mich dao in haaj verkeke? Inèns leep hae nao de kapsjtok en pakdje häör jes. Óngertösse det ze de jas aandeje, zag hae tamelik hel: 'Zoeë doon we het. En neet angers.' Ich wis neet waat ich huerdje. Haaj ich get gemistj? Het maedje sjputterdje nog get taege: 'Wèts se det zeker?' 'Zoeë en neet angers!' Het klónk tamelik bars. Niks väör eine sopsieme. Het kittig dink veel mich vies taege. Het deej zien rits toe en zag: 'Tuurlik, det höb ich altied al gevónje.'

 

 

2019, waek 6

 

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.