'Loesters se waal?' vroog de man aan de vrouw die rechts achter hem sjtóng op de Mertj in Remunj. Hae keek sjuun väör zich oet nao baove en waas häör mèt ein hand baove de ouge vanalles aan het vertèlle, zónger zich nao häör óm te drejje. Óngertösse wees hae mèt zien anger handj woeë zuuj op mós lètte. Zien vermoede det de vrouw neet loesterdje waas terecht. Of waas het gein vermoede, mer ein verwiet? Asof het hem dökker äöverkwoom det hae get vertèldje en zuuj neet loesterdje. Dao zeen van die miense die neet in de gate höbbe det ze ouch èns de móndj mótte haoje. Die zoeë verleefdj zeen op häör eige sjtum det ze neet kinne zjwiege. Of deze miens zoeë emes waas? Ich zoog gein teikens die dao op zoje kinne wieze. Of het zooj ziene sjlappe sjnor mótte zeen en de zjwaor roeëj bakkebaarde.
Wie dan ouch, de vrouw waas mèt häöre aandacht neet bie zien verhaol. Ze mook foto's mèt häöre tillefoon. Toch haaj ze zien vraog waal gehuerdj, want ze vroog: 'Waat zaes se?' Ze wachdje zien antjwaord neet aaf, ging get nao achter hange, heel de tillefoon zoeë wied mäögelik van zich aaf en ging wiejer mèt fotografere. Het zoog d'r artistiek oet, mer of det ouch baeter foto's zooj oplevere, betwiefelde ich. 'Ich vroog of se waal loesters,' zag de man get helder. Hae kaldje nog sjteeds zónger nao häör te kieke. 'Ich sjtaon dich neet väör niks oet te ligke waem die acht figure van het carillon zeen. 'Kiek dao de sjnieder. Det is eine profietelike.'
'Die zón sjteit vervaelendj,' zag de vrouw. 'Het leecht vèltj precies verkiërdj. Ich gaon dao sjtaon.' Ze leep eine maeter of tiën weg nao links. Of de man det neet haaj versjtange? Hae ging zónger op of óm kieke door mèt kalle. 'Welk figuur vinjs doe het sjoeënste?' Twië seconde later drejdje hae zich väörzichtig óm nao links. Zien gezicht waas roeëjer as zien bakkebaarde. Het antjwaord van ein aoj vrouw die al dae tied achter hem sjtóng, waas aangekómme: 'De zjwetskammezaol.'
2022, week 18
