Väör de ardigheid en ómdet het neet angers kós, eine aoje kolumn van achttiën jaor geleje. Sjtóm, sjtóm, sjtóm! Subbedaejese zeen we. Achterlik en ónnuezel. Asof we oet ein vergaete dabbegaat kómme woeë de rame van de hoezer zeen toegehange mèt aoj zek. Woeë de zaegel van de modern besjaving aan ós is väörbie getrokke. Woeë we zeen blieve sjtaeke in de Middel Iëwe en bie wieze van sjpraeke de kèrk nog binnezitte as het raegeltj. Het ergste is det we dao noe pas achterkómme, in 2006. Altied höbbe we gedachtj det de haof d’r waas väör blome in te paote en greuntje. Väör d’r in te wèrke, in de zón te zitte of väör oet te röste. Och, och, och, waat zeen wae braodworste det wae neet in de gate haje det het bie de haof óm gans get angers geit.
Gelökkig deej de gezèt zaoterdig in Scala versjlaag van ein tuinbeurs die wètj woeë het óm geit in het ‘tuingebäöre’. Dao tèltj mer ein dink: ‘tuinbelaeving’. Waem ‘tuinbelaeving’ wiltj, kan neet zónger käöke in de haof: ein boetekäöke. Claudia Rusink wètj alles van ‘tuinbelaeving’ aaf. Ze sjteit op de beurs mèt ein ‘totaalconcept’ det ‘Kaokboete’ hètj. Naftali Leidelmeijer geuft ós zelfs ein pittige waarsjuwing. ‘In 2020 kins se neet zónger de boetekäöke as se familie en vrinj op de juuste maneer wils óntvange’. Ellie en ich trèkke ós die wäörd aan, want wae óntvange gaer familie en vrinj. Haopelik ouch nog in 2020. We pakke het waal drek tegooj aan.
Ónger ós boetekäöke make we eine boetekelder mèt ein sjtevige boetekeldertrap. Äöver het boetekeldertrappegaat kumtj ein boetekelderloek det automaties aop en toe kan. Väör ein maximaal ‘tuinbelaeving’ make we verder ein boetesjlaopkamer väör ószelf en ein of twië boetegastesjlaopkamers, mèt lichtelik ein boetebabykamer. Die kumtj naeve de bo2020etebadkamer en ónger de boetezölder. Ómdet we min plaats äöverhaoje väör het ‘aojerwets tuingebäöre’ zitte we binne in de hoeskamer eine tuinkas väör de blome. In de däörgate make we pergola’s. Zoeë hove we ós in 2020 äöver het ‘woeëngebäöre’ gein zörg te make en zitj het dan ouch sjnor mèt ós ‘tuinbelaeving’.
