Ich bèn nao de A-jeugd oetgesjèdj mèt foetballe, ómdet d'r geine Cruyff in mich hoesdje. En väör minder mós ich het neet doon, mook ich michzelf wies. Ich volgdje het foetballe waal op de televisie. Ajax waas in opkomst en det vónj ich geweldig. Ich waas en bèn nog altied supporter op aafsjtand, ouch noe het die ploog get minder geit. Wie ich op de kweeksjoeël zoot, höb ich in 1969 mien sjtudie zelfs geriskeerdj väör Ajax.
De Amsterdammers móste in Tsjechoslowakije sjpele taege Spartak Trnava in de halfve finale van de Europacup I. Thoes haaj Ajax mèt 3 - 0 gewónne. Mer die Tsjeche wore nog neet versjlage. De wedsjtried waerdje sjmiddes op de tv oetgezónje, mer ich haaj les. Eine kiër sjpijbele waas toen al genóg väör van sjoeël gesjtamptj te waere. Mer ich fietsdje dae middig royaal väör de wedsjtried nao hoes väör te kieke. Het waas hartsjtikke sjpannendj. Ajax verlaor mèt 2-0, mer zoot, door die ein gool miër, in de finale van de Europcup! Sangerdaags mós ich bie de directeur kómme, eine geistelik woeë ederein sjoew väör waas, ouch de liërare. Dae miens haaj last van zichzelf, altied króm zin en haaj ein belabberdje reputatie. Mer ich haaj Ajax gezeen!
Hae vroog drek, tamelik kortaaf: 'Waar was je gistermiddag?' Ich zag det ich nao hoes waas gegange en hóng ein verhaol op det ich op de plaats verzón. Het leecht van miene fiets waas kapot, zag ich, en det kós ich neet zelf op sjoeël reparere en we haje tot aan het begin van de aovendj les, as het al dónker begós te waere. Dan zooj ich door de duuster heivers mótte fietse. Det waas laevesgeviërlik en, zag ich d'r mèt nadrök achteraan, ich zooj as aansjtaondje óngerwiezer ein sjlecht väörbeeldj gaeve. Ich vertèldje de directeur det ich hem nog gezóchtj haaj, mer neet haaj kinne vinje. Dus haaj ich in dees situatie van äövermacht gekaoze väör het minst erge, ouch ómdet ich sjmiddes nog nao de fietsemaeker kós gaon. Ajax haaj verlaore mèt 2 - 0, mer ich wón. Mèt 1 - 0.
2026, week 26
