ColumnsFrits Criens

Column Modertaal : BLOES door Frits Criens

Leudal / Midden Limburg

Ich zoot bie de Luemäöle op ein bank. Achter mich sjlingerdje de mäöletak van de Luebaek zich eine waege tösse de sjtruuk. Vlak bie goof eine liester ein konzaer van bóntje geluide. De wind droog het gezang perfect nao mich haer. Mèt de ouge half gesjlaote zoot ich te genete: vakantie in eige landj op nog gein keteer loupe van hoes. 'Dit is väör geldj neet te koup,' dach ich, 'mer het is hie väör niks te kriege.' Ich probeerdje die zin te ónthaoje väör ze in ein gedicht te gebroeke, of in eine roman. Mer ja, zoeë get dinke, is dök al te väöl. Bekans op hetzelfdje moment zatte zich twië dames op de picknickbank väör mich, mèt de rögk op de zón, het gezicht nao mich haer. Ze kwetterdje asof ze op eine döbbele corona-aafsjtand taege de windj in móste kalle.

 

'Ich höb het heit, zag de ein en ze knuipdje häöre roeëje bloes gans los.

'Alles waat laeftj mót lócht höbbe.' Ze droog geine bh. Ich heel mich sjlaopendj en probeerdje neet te loestere. Mer de twiëdje vrouw vroog: 'Ligktj dae dao te sjlaope of zooj hem get mankere?' 'Dae ligtj te druime,' zag het roeëd bluuske. 'Van seks, natuurlik.' Ich probeerdje mien gezicht in de ploeëj te haoje. 'Van seks,' vroog de anger, 'dinks se det hae dich zoeë zuut zitte? Of kins doe gedachte laeze?' 'Alle mansluuj druime van seks,' zag het roeëd bluuske. 'En aoj menkes nog het meist. Det is pas óngerzóchtj. En dae dao liektj d'r mich echt zoeë eine.'

 

'Oeioei, dan doot dich dae bloes mer rap toe,' zag de twiëdje vrouw. 'Angers waertj hae nog lestig as hae oetgesjlaope is.' Ich haaj genóg gehuerdj, sjtóng op, bleef op angerhalve maeter van häör sjtaon en keek häör ein väör ein deep in de ouge. Die mèt de bloes aop waerdje roeëd tot wied ónger de navel. Mèt ein paar wäörd haaj ich häör klein kinne make, mer ich mook ein lichte buging en zag. 'Dames. Wiltj gae thoes wiejer druime van mich, kiek dan op www.fritscriens.com en ouch op facebook.'

 

2020, waek 23

Frits Criens

Frits: stadsdichter van Leudal, publiceert proza, poëzie, light verse en toneel in ABN en dialect. Zijn column Modertaal was bijna een kwart eeuw lang een van de hoogtepunten in Dagblad de Limburger. Ernst en humor zijn twee gelijkwaardige elementen in zijn werk, dat helder is en direct. Criens is een innemend performer en verteller die lezers en luisteraars boeit en meeneemt in zijn gedichten en verhalen.