Ich höb altied gedachtj det daakhaas ein anger waord is väör eikuerke. Gelökkig is eine miens noeët te aod väör te liëre. Op de iërste daag van mien 75ste kreeg ich dao al het bewies van. Ich zoot ein sjtök te laeze äöver de ramp dae hoeskatte aanrichte in de natuur. Noe bènj ich van hoes oet al geine katteleefhöbber. Mien vader waas doevemèlker. Dus wae haje thoes gein katte, waal eine hóndj dae achter de katte aanzoot as die te dun in de buurt kwome. Hoeskatte blieve neet binne, mer zjwerve róndj. Baasjes van huunj zorge d'r äöver het algemein väör det häöre hoesvrindj neet bie anger miense in de haof róndjlöptj. De meiste kattebaasjes kan het niks sjille det häör deer in angermans haof kumtj.
In het sjtök det ich aan het laeze waas, sjtóng det hoeskatte richtige maordeniers zeen. Vergeleke mèt katte zeen wolve braaf huundjes. Miljoene veugelkes per jaor waere door katte gevange en gans of half opgevraete. Het sjientj det sommige saorte veugel daodoor zelfs dreige oet te sjterve. Het probleem is nog lang neet opgelostj want katte zeen eigewies en de meiste kattebaasjes haoje häör biëst neet binne. Het waas ein interessant sjtök woeë ouch het waord daakhaas in veel. Ich dach: Waat haet het eikuerke hie mèt te make? Dus väör de zekerheid zóch ich het waord op.
Waat bleek? Daakhaas is ein synoniem väör kat. En dan väöral kat as gerecht. Het sjientj det miense vreuger en in de aorlog van hónger en ermood ouch katte ote. De sjmaak van gebraoje kat ligktj tösse de sjmaak van haas en knien in. Det höb ich neet oet eige ervaring. Ich bèn ouch neet van plan te controlere of det kloptj, ouch al sjtaon d'r op internet aantrèkkelike recepte. Wie ich zón recept loos, veel mich get in waat ich baeter neet kan opsjrieve. De sjlachting die katte ónger veugelkes aanrichte, waas aojerwets op te losse. Det waas good väör het milieu en de taal kreeg d'r ein noew oetdrökking bie: neet allein de hóndj, mer väöral de kat in de pot vinje.
2024, waek 19
