Väöl wachtkamers in het zekehoes zeen op de gank. Ellie en ich zatte ós sjuun taege-äöver twië patiënte die mèt ein aan de kal wore. Drök en hel, ze haje het riek allein. Zoeë drök det de dames neet in de gate haje det ze gezelsjap krege. Zoeë hel det we eder waord móste versjtaon, of we det wole of neet. Ich wool häör vraoge of ze neet bie de kno-arts móste zeen, ómdet ich het idee haaj det ze allebei douf wore. Ich heel aevel mien fatsoen en volgdje óngewildj ein bezunjer gesjprek. De vrouw mèt de raoze bril, zag: 'Ich zègk dich det dae Dieke det gedaon haet. Doezendj procent zeker.' De anger vrouw mèt ein zjwart laere handjtas op häöre sjoeët zag: '1000%? Haet dae Dieke het dich dan zelf vertèldj?'
'Tuurlik neet,' keef de raoze bril. 'Waem zooj het angers höbbe gedaon?' 'Det mós se mich neet vraoge,' zag de laere tas. 'Ich vinj des doe niks verkiërdjs van eine miens mós bewaere as se het neet zeker wèts. En nemes wètj waem het haet gedaon. Doe dus ouch neet.' De raoze bril waas ein fel tante. 'Iërstdaags kumtj het d'roet det dae Dieke het is. En nemes angers. Det gaef ich dich op ein breefke.' 'Det kan zoeë zeen,' heel de handjtas vol. 'Mer iërstdaags is neet noe. Dus mós se hie neet hel-op get sjlechts bewaere äöver dae Dieke. Det is laster. En dao haoj ich neet van. Ouch neet van diene laster. Dao brings doe negativiteit mèt in de waereldj. En negativiteit is d'r al zat. Dao hove we dien läöges äöver dae Dieke neet bie te höbbe. Ouch al dougtj dae neet.'
De raoze bril waas getraoje. 'Doe dörfs waal get te zègke. Ich, laster en läöges vertèlle! Ich zègk gewuen waat ich dink.' 'Good,' zag de laere tas. 'Doe bewaers väör waor waas se äöver dae Dieke dinks. Mer waas dich dinks, is nog gein waordheid.' 'Aoh nae,' vlaog de raoze bril oet. 'Wie wèts doe det zoeë zeker?' De laere tas waas het zat: 'Ómdet ich det dink. Daoväör!'
2024, waek 16
