Dao zit muziek in antiek/ Det waerde vreuger weggesmete; Dao zit muziek in antiek/ Het is pas good as het is verslete; En ederein dae betaalt/ Ouch as hae gaar neet zaat is; Veur eine klómmel woeë hae gaar niks mèt kan doon/ Veul te veul ... as het mer aad is. Dees prachtige tekst van Arnold Wassen oet de Ruiver kwoom mich vanoet eine winkel taege. Antiekzake wese in de jaore zestig en seventig wie puine. Alles waat oma wool weggoeëje waas inèns antiek. Gedumpeldje veldjflesse, besjadigdje, emaille zeipbekjes met het opschrift 'zeep', gipsheilige zónder naas of henj, votebenkskes vol houtworm, of póppewages zónger rajer .... mèt het etiket 'antiek' d'rop steeg bie mennigein de koorts van het wille höbbe tot laevesgevierlike huegdje. Dao zoot wörkelik muziek in antiek, väör de hanjeliere.
Het hoeëgtepuntj van de antiek-epedemie ligktj wied achter ós. Mer toch sjtook het antiekvirus ein jaor of vieftiën trök weer de kop op. Aan de grachtegordel en anger plaatse väör yupperig en hip volk begós het as 'vintage' aan ein noew carriére. De muffe, dónker antiekzake waerdje leechte 'shops', sjpeels ingerichtj mèt ein 'trendy' oetsjtraoling. Waem wool dao neet gezeen waere as klantj? 'Vintage'. Dae het waord oetsjpriktj, waertj d'r verleefdj op. Mer wie hètj emes dae vintage verköptj?
Die dwingendje vraog heel mich nachte oet de sjlaop, want ik wool in de optocht mètloupe as Vintageverkuiper. Mer det waord is te drueg, meukt nemes lekker. Het is väöl te braaf väör kans te make op eine pries. 'Het waord 'verkuiper' meuktj de sensuele sjpanning van het waord 'vintage' kapot. Wie mós ich mich in de optocht in gosdsnaam neume? Vintagist, vintageur, vintagair? Het klinktj allemaol net neet good. Ich waerdje d'r lestig van.
Vannacht mós ich inèns aan Nol Wassen dinke en zien Er zit muziek in Antiek. Nol is jaomer genóg ein paar jaor geleje gesjtorve. Dus ein prachtig leed van hem äöver 'vintage' zitj d'r neet mier in. Dan mós ich det mer zelf make. Det besjloet leverdje mich al drek ein lekker waord op väör 'vintageverkuiper'. Plus ein melodie väör eine schlager van dae naam. Ich kreeg d'r zelf hoondervel van. Dus maak ich mien noew waord mèt het refrein van mien leedje hie alvast bekindj. De optocht dit jaor laot ich troewes sjete, want in 2021 wil ich mètdoon aan het LVK-leedjesconcours mét de titel De Vintagekloeët.
REFREIN
De hanjel in antiek waas bienao doeëd
Dae aoje kraom .... waas neet mier te verkoupe
Mer vintage waas de redder in de noeëd
De zaak begintj ... weer wie ein tiet te loupe
Ich bèn weer riek, ich bèn weer sjterk, ich bèn weer groeët
Ich bèn de käöning van de kraom as Vintagekloeët
Ich bèn de käöning van de kraom ... as Vintagekloeët
Alaaf!
