Doe liers emes pas kinne as se mèt hem mós deile. Bedoeldj is dan het deile van de inboedel van ein hoes nao ein sjterfgeval. De waerde is dök väöral emotioneel, zitj in herinneringe aan ein väörwerp. Daoväör kan het deile families oetein riete. Zeker as dao anger probleme in mètsjpele, of aafgunst. Nog mer gezjwege äöver vreigel tösse eige kinjer en aangetrouwdje. Pas huerdje ich het verhaol van twië breurs oet Hoensbrook. Ze krege herrie äöver ein fornuus det bie mam in de käöke haaj gesjtange. Det erfsjtök sjtóng in het sjeurke ónger sjtaof en sjpinnewebbe weg te roeste. As kindj haje de breurs väör het fornuus mótte zorge. De kit mèt kaole mós altied vol naeve het fornuus sjtaon. En de plaat mèt de ring móste saoterdes waere gesjoerdj, tot alles blónk wie eine sjpegel. Angers krege de jónges ze gerete mèt sjtaove-iezer of matteklopper. Mam mepdje d’r gaer en flink op los.
De breurs bleve herrie make äöver waem het fornuus zooj erve. Oeteindelik kreeg häör zöster häör zoeë wied det ze wole laote. Dae wón kreeg het fornuus, mer mós € 200 van zien erfdeil inlevere. De aodste wón. Hae haaj ein paar waeke flink werk väör de zaak zuver te kriege en op te knappe. Achteraaf bleek het toch neet mier het fornuus te zeen van zien herinneringe. Zien vrouw wool de klómmel neet èns in hoes höbbe sjtaon.
Van erme ozel zatte ze het op Marktplaats. Geine hóndj haaj interesse. Zoeë zakdje de vraogpries nao € 100. De jóngste broor kreeg dao lócht van en sjtuurdje d’r eine vrindj op aaf. Nao väöl hanjele kreeg dae vrindj het fornuus mèt väör € 50. Hae goof het aan de verlezer as cadeau väör ziene verjäördaag. Dae sjtuurdje zien aojer broor mèt Noejaor ein foto van het formuus mèt de bèste winse en de triomfantelike vraog: ‘Höbs doe het aod sjtaove-iezer nog thoes ligke?’ Het antjwaord waas aeve triomfantelik: ‘Jao! En de matteklopper ouch nog. Kóm ze dich mer allebei haole.’ Det haet de jóngste noeët geriskeerdj. De aodste sjtaaltj te väöl op zien moder.
2021, waek 24
