De twië oudjes sjtónge in de super bie de keulbak mèt sjnievleis. Ich kós häör neet. Ze droge dieke wolle jes, jaore fieftig. Ich keek väörzichtig nao häör veut. Ze droge gein klump. Waal degelike, blinkendj gewiksdje sjoon, aojerwets broen. Hae haaj eine hood op dae waal èns nao de sjtoumerie zooj moge. En dan zègk ich het nog väörzichtig. De vrouw droog zónne kopplak woeë vrouluuj vreuger mèt nao het veldj ginge. Ich kós mich neet väörsjtèlle det dees krómp gewèrkdje miense op eige gelaeg nao de winkel wore gekómme. Mer ich zoog nemes dae häöre chauffäör zooj kinne zeen. Ze wore zeker ein sjtök in de tachtig.
Man en vrouw? Mesjien, mer ze kóste net zoeë good broor en zöster zeen. Het waas vreuger hiel gewuen det óngetrouwdje kinjer nao de doeëd van häör aojers bie-ein bleve woeëne. Ein praktiese oplossing woeë ederein mèt gebaadj waas. Zón dinger gaon mich door de kop as ich aan het fantasere sjlaon äöver zake woeë ich niks vanaaf weit, mer waal gaer alles van zooj wille weite. Det is natuurlik ein van mien aafwiekinge. Ich zègk det mer vast zelf. Neet det ich het erg vinj, want as sjriever kins se van dit saort noesjierigheid waal èns väördeil höbbe. Ich sjaof get dunder op häör aan väör häör taal te huere. Dao zoot dudelik ein rollendje R in.
Ze kaldje äöver dRuegwoRst. Det zooj d'rop kinne wieze det dees twië oet Naer kwome, woeë in de jaore sestig die rollende R nog gewuen waas bie aoj miense. Efeng, ich kreeg gauw genóg mèt det ze zich sjtraeveldje äöver CoRnet beef, zoeë sjproke ze het ouch oet. Ze kóste det bótterhammevleis allebei neet, mer de vrouw wool het waal gaer probere. Hae weigerdje want haaj 'det geRei nog noeët gepReufdj.' 'Sjtel dich èns väöR,' probeerdje zuuj. 'As se het waal al èns haads gehadj, zoojs se het dich dan waal wille kRiege as het op de taofel sjting?' Hae sjödje de kop: 'Det weit ich zoeë pRónt nog neet. As het mich de väöRige kieR gesjmaaktj haaj, mesjien waal. MeR angeRs?'
2020, waek 5
